O‘zbekistonda Ramazon hayiti kuni 2023-yil 21-aprel, juma kuniga to‘g‘ri kelishi haqida dastlabki xulosalar qilinmoqda. Bu haqda Fatvo markazi axborot xizmati xabar berdi.
Xabarga ko‘ra, ulamolar va malakali mutaxassislardan iborat ishchi guruh Ramazon hayiti kuni – yangi Shavvol hilolini astronomik tahlillar hamda xorijiy davlatlardagi mutaxassislar bilan hamkorlikda kuzatib bormoqda. Hatto ishchi guruh vakillari AQSH, Turkiya, Janubiy Koreya va Rossiya mintaqalarida ham kuzatish ishlarini olib bormoqda.
Xorijdagi nufuzli astronomiya markazlari va Fanlar akademiyasi qoshidagi Astronomiya institutidan olingan maʼlumotlarga ko‘ra, 2023-yil Ramazon hayiti kuni, yaʼni Shavvolning yangi oy fazasi shu yil 20-aprel, payshanba kuni Toshkent vaqti bilan soat 09:12 da, Saudiya Arabistoni vaqti bilan esa 07:12 da sodir bo‘ladi. Astronom olimlar xulosasiga ko‘ra, shu kuni Shavvol oyi hiloli O‘zbekiston hududida ko‘rinmasa-da, lekin dunyoning ayrim mintaqalarida ko‘rish mumkin bo‘ladi.
Hanafiy fiqhi manbalarida bir makonda yangi hilol ko‘rilishi dunyodagi jami musulmonlarga Ramazon hayitini nishonlashni joiz qiladi. Bunga hanafiy, molikiy va hanbaliy mazhablaridan iborat jumhur ulamolar ittifoq qilgan.
Sharʼiy masalalar va astronomik hisob-kitoblarga tayangan holda 1444-hijriy yil Shavvol oyi hiloli milodiy 2023-yil 20-aprel kuni Yer yuzining ayrim hududlarida kuzatiladi. Shu bois Ramazon hayiti kuni 2023-yil 21-aprel, juma kuniga to‘g‘ri kelishi haqida dastlabki xulosalar qilinmoqda. Aytish mumkinki, AQSH, Turkiya, Qozog‘iston, Qirg‘iziston, Tojikiston, Turkmaniston kabi bir qator davlatlar tomonidan joriy yil 21-aprel, juma kuni Ramazon hayiti, deb eʼlon qilindi.
“Falakiy hisob bo‘yicha hayit kuni maʼlum bo‘lsa-da, hazrati payg‘ambarimiz sallollohu alayhi vassallamning yangi oyni ko‘rib, ro‘za tutinglar va yangi oyni ko‘rib, hayit qilinglar, degan hadisi shariflariga asosan mazkur ishchi guruhining AQSH, Turkiya va G‘arb davlatlaridagi vakillarining hilolni kuzatish to‘g‘risidagi oxirgi maʼlumotlari olingandan keyin 2023-yil 20-aprel kuni yakuniy xulosalar taqdim etiladi, inshaalloh.
Qayd etish kerakki, ibodat masalasida doim ehtiyot bo‘lish lozim. Ramazon ro‘zasining boshlanishi va tugashi faqat yurt muftiysi tomonidan eʼlon qilinadi, mo‘min-musulmonlar esa shu fatvoga ergashishlari shart bo‘ladi.
Demak, internet saytlari yurituvchilari va ijtimoiy tarmoqlar foydalanuvchilaridan ushbu masalada turli xabarlarni tarqatish orqali xalqimizni asl vaziyatdan chalg‘itmaslikni iltimos qilamiz.
Shu kunlarda O‘zbekistonda Ramazon hayiti kuni rasmiy manbalarda eʼlon qilinadi”, deyiladi xabarda.
Izoh (0)