Татаристон раҳбари Рустам Миннихановнинг айтишича, Молдова ҳукумати уни мамлакатга киритмаган ва “номақбул шахс” деб эълон қилган. Миннихоновнинг видеомурожаати Gagauznews Telegram-каналида эълон қилинди.
Видеода Минниханов самолёт салонида ўтириб, Кишинёвга Молдова автоном ҳудуди бўлган Гагаузия раҳбари лавозимига номзод Виктор Петров ва Молдова парламенти депутати Александр Суходолскийнинг таклифига биноан келганини айтади.
“Афсуски, Молдова ҳукумати қарори билан биз бу мамлакатга ташриф буюра олмайдиган номақбул фуқаролар деб топилдик. Шунинг учун, афсуски, биз халқлар дўстлиги конгрессида қатнаша олмаймиз”, — дейди Татаристон раҳбари.
Суходолскийнинг “ТАСС”га айтишича, Минниханов Кишинёвга Молдова парламенти депутатлари ва Гагаузия парламенти аъзолари таклифига биноан учиб келган. “Мен Миннихоновни барча ҳужжатлар билан аэропортда кутаётган эдим. Кишинёв аэропортида уни самолётдан туширишга ҳам рухсат беришмади. Кириш тақиқлангани тўғрисидаги ҳужжатни топширишди”, — деди депутат.
Қайд этилишича, Минниханов Гагаузияга “Халқлар дўстлиги – 2023” халқаро конгресси учун келган. Молдовада сиёсатчига ҳамроҳлик қилган “Ак-Барс” холдинг компанияси раҳбари Иван Егоров ҳам “номақбул шахс” деб тан олинган, тадбиркор ва Татаристон раҳбари ўтирган самолёт Кишинёвдан Россияга қайтиб кетган.
Молдова Миннихоновнинг ташрифи аввалдан келишилмаганини даъво қилмоқда
Айни пайтда, “Интерфакс” ахборот агентлиги Молдова чегара полицияси матбуот котиби Раиса Новицкийнинг сўзларига таяниб, ёзишича, “Татаристон делегациясининг келиши Молдова ҳукумати билан келишилмаган, Гагаузия автоном маъмурияти эса халқаро форум ўтказишни режалаштирмаяпти”.
Ҳозирда Гагаузияда мухториятнинг янги раҳбарини сайлаш учун сайлов кампанияси давом этмоқда. Сайловлар 30 апрелга белгиланган. Уларда 8 нафар номзод иштирок этади. Уларнинг барчаси россиялик сиёсатчиларнинг қўллаб-қувватловини олиш учун ҳаракат қилмоқда, чунки Гагаузия Россия билан яқинлашиш тарафдори, деб эслатди “Интерфакс”.
Изоҳ (0)