Qirg‘izistonda Ramazon hayiti (Iyd al-Fitr) 21-aprel kuni nishonlanadi. Bu haqda respublika musulmonlari diniy boshqarmasi matbuot xizmati xabar berdi.
Mazkur qaror Qirg‘iziston musulmonlari ulamolari kengashi tomonidan qabul qilingan. Hayit namozining dasturi keyinroq e’lon qilinadi.
Turkmanistonda esa Ro‘za hayiti munosabati bilan 21-aprel dam olish kuni deb e’lon qilindi. Tegishli qaror prezident Serdar Berdimuhamedov tomonidan imzolangan. Turkmanistonda hayit bayrami 1998-yildan beri nishonlanib kelinadi.
Avvalroq Turkmaniston rahbari Qadr kechasi sharafiga qamoq jazosini o‘tayotgan 463 nafar mahkumni afv etgandi. Viloyat, tuman va shahar hokimliklari rahbarlariga afv etilgan shaxslarni ishga joylashtirish choralarini ko‘rish topshirilgan.
Tojikiston Din ishlari bo‘yicha qo‘mitasi mamlakatda Iyd al-Fitr 21-aprel kuni nishonlanishini ma’lum qilgan. Ramazon oyi tugashi munosabati bilan bayram namozi 21-aprel kuni respublikadagi barcha masjidlarda mahalliy vaqt bilan soat 06:30 da o‘qiladi. Dindorlar bayramda muhtojlarga yordam berishga, isrofgarchilik qilmaslikka chaqirilmoqda.
Avvalroq Musulmonlar idorasi O‘zbekistonda Ramazon hayitini nishonlash sanasi qachon rasman e’lon qilinishiga oydinlik kiritgandi. Jumladan, Ramazon hayitining birinchi kuni haqidagi ma’lumotlar Ulamolar kengashi tomonidan ko‘rib chiqilishi va tegishli xulosalar qabul qilinishi bildirilgan.
Izoh (0)