Turkmaniston prezidenti Serdar Berdimuhamedov Qadr kechasi sharafiga qamoq jazosini o‘tayotgan 463 nafar mahkumni afv etdi. Bu haqda Turkmenportal xabar berdi.
Tegishli farmon Turkmaniston rahbari tomonidan 2023-yil birinchi choragi yakunlariga bag‘ishlangan hukumat yig‘ilishida imzolandi. Hujjat afv etilgan shaxslarni ozodlikdan mahrum qilish tarzidagi asosiy jazoni o‘tashdan ozod qiladi.
Bundan tashqari, Berdimuhamedov Davlat xavfsizlik kengashi kotibi va huquq-tartibot idoralari rahbarlariga sobiq mahkumlarning tezroq oilalari bag‘riga qaytishi uchun choralar ko‘rishni topshirgan.
Shuningdek, viloyat, tuman va shahar hokimliklari rahbarlariga afv etilgan shaxslarni ishga joylashtirish choralarini ko‘rish bo‘yicha topshiriqlar berilgani xabar qilingan.
Izoh (0)