Ramazon oyi bu yil 29 kun bo‘lishi haqida turli xabarlar tarqaldi. O‘zbekiston Musulmonlari idorasi fatvo markazi direktori o‘rinbosari, Toshkent islom instituti o‘qituvchisi G‘ulomiddin domla Xolboyev mazkur savollarga javob berdi.
G‘ulomiddin domla Xolboyevning so‘zlariga ko‘ra, Ramazon hayitining ilk kuni borasida muftiy hazrat boshchiligidagi ishchi guruh, ulamolar izlanmoqda. Tez orada bu bo‘yicha maʼlumot taqdim etiladi. Shuningdek, Ramazon oyi 29 kun bo‘lishi ham mumkinligi aytildi. Fatvo markazi direktori o‘rinbosarining taʼkidlashicha, buning sababi Oyga bog‘liq.
“Bu yilgi Ramazon 29 kun bo‘lishi haqida juda-juda ko‘p savollar kelyapti. Bu yilgi Ramazonning 29 yoki 30 kun bo‘lishi borasida muftiy hazrat boshchiligidagi ishchi guruh, ulamolar qattiq izlanyapti, bu masalani o‘rganyapti. Tez kunlarda bizga bu boradagi oxirgi xulosalarini eʼlon qiladilar. Ramazon 29 kun bo‘lishi mumkinmi, degan savolga to‘xtaladigan bo‘lsak, Ramazon 29 kun bo‘lishi mumkin. Chunki shu paytgacha bir necha marta mana shunday 29 kun qilib musulmonlar ro‘za tutganlar. Buning sababi Oyga bog‘liq. Masalan biz-u siz biladigan shamsiy oylar necha kun bo‘lishi aniq. Lekin ibodat hisob-kitob qilinadigan oy qamariy oylar bilan hisob-kitob qilinadi. Bunday oylar yo 29 kun yo 30 kun bo‘ladi. Oyning chiqishiga qarab farq qiladi”, — deydi G‘ulomiddin domla Xolboyev.
O‘zbekiston musulmonlari idorasida Ramazon oyi va hayitini munosib kutib olish, Islom dini tartib-qoidalari asosida hilolni kuzatish bo‘yicha ishchi guruh faoliyat yuritmoqda. Mazkur ishchi guruhning vakillari yurtimizning turli hududlarida hamda AQSH, Turkiya, Janubiy Koreya va Rossiya mintaqalarida ham kuzatish ishlarini olib bormoqda.
Izoh (0)