Amerikalik biznesmen, milliarder Ilon Mask TruthGPT nomi ostida yangi chatbot ishga tushirishini aytdi. U bu haqda Fox News telekanaliga bergan intervyusida ma’lum qildi.
“Men TruthGPT’ni yoki koinot tabiatini tushunishga harakat qiladigan, maksimal haqiqatni qidiruvchi sun’iy intellektni (AI) ishga tushirmoqchiman”, — dedi Mask.
Milliarder bunday chat-botni ishlab chiqish xavfsizlikning ishonchli yo‘li ekani, chunki koinotni tushunishga g‘amxo‘rlik qiladigan AI odamlarni yo‘q qilishi dargumonligini ta’kidladi.
Shuningdek, Mask sun’iy intellektning xavf-xatarlariga to‘xtalib, uning sivilizatsiyani yo‘q qilish salohiyatiga ega ekanini qo‘shimcha qildi. Milliarder ilk bor TruthGPT haqida 2023-yil boshida Twitter’dagi sahifasida ma’lum qilgandi, jumladan, Mask “Bizga TruthGPT kerak” degan tvit qoldirgandi.
O‘z navbatida, Ilon Mask sun’iy intellekt (AI) sohasida ishlaydigan X.AI kompaniyaga asos soldi. Kompaniya Nevada shtatida ro‘yxatdan o‘tgan. Ilon Mask uning yagona direktori, kotibi esa o‘tgan oy ishga olingan moliya direktori Jared Birchall.
Mask Alphabet kompaniyasining DeepMind AI laboratoriyasi olimi Igor Babushkinni ham ishga olgan. U, shuningdek, ChatGPT chat-botini ishlab chiqqan OpenAI kompaniyasi xodimlarini o‘z kompaniyasiga taklif qilmoqchi bo‘lgan, biroq bunga erisha olmagan.
Izoh (0)