Rossiya prezidenti Vladimir Putin okkupatsiya qilingan Xerson va Lugansk xalq respublikasiga tashrif buyurdi. Ukraina prezidenti ofisi mazkur tashrifga munosabat bildirdi.
Vladimir Zelenskiy ofisi rahbari maslahatchisi Mixail Podolyak Putinning Ukraina hududlariga tashrifini baholadi.
“Putinning evolyutsiyasi (degradatsiyasi) ta’sirli. Bir yil oldin dunyo uning bayonotlarini kutayotgan edi. U nima deydi? Nima qiladi? Bugun esa dunyo befarq”, — dedi Podolyak.
Siyosatchi dunyo uchun endi Rossiya prezidenti kabi siyosiy subyekt mavjud emasligini bildirdi. Podolyak Putinning Ukrainaning bosib olingan hududlariga safarini “ommaviy qotillik muallifining maxsus sayohati” deb ta’rifladi. Rossiya prezidenti bunday tashrifni “jinoyatlardan zavq olish” uchun amalga oshirishi ta’kidlandi.
Putinning Ukrainaning ikki viloyatiga tashrifi
18-aprel kuni Rossiya matbuoti Vladimir Putinning Xerson yo‘nalishidagi “Dnepr” qo‘shinlari guruhi shtab-kvartirasiga tashrif buyurgani haqida xabar berdi. Rossiya prezidenti guruh qo‘mondoni, general-polkovnik Oleg Makarevich va Rossiya havo-desant kuchlari qo‘mondoni, general-polkovnik Mixail Teplinskiyning hisobotlarini tingladi.
Ijtimoiy tarmoqlarda Rossiya prezidenti safaridan video e’lon qilindi.
Xuddi shu kuni Ukraina rahbari Vladimir Zelenskiy Ukraina qurolli kuchlarining Donetsk viloyati Avdeyevkadagi oldingi pozitsiyalariga tashrif buyurdi. “Qahramonlarimiz yonida ekanligimdan faxrlanaman”, — dedi Zelenskiy.
Putinning bosib olingan Mariupolga tashrifi
19-mart kuni Putin Mariupolga vertolyotda tashrif buyurib, shundan so‘ng u shaharning bir qancha tumanlarini mashinada aylanib chiqqandi.
Nevskiy mikrorayonida u shahar aholisi bilan suhbatlashgan, shuningdek, qirg‘oq bo‘yi, yaxta-klub hududi, shaharning tarixiy joylarini borib ko‘rgan. Shundan so‘ng u Rostov-Donga jo‘nab, u yerdagi “maxsus harbiy operatsiya” qo‘mondonlik punktida yig‘ilish o‘tkazgan.
Ukraina prezidenti ofisi rahbari maslahatchisi Mixail Podolyak Putinning anneksiya qilingan Mariupolga tashrifi haqida fikr bildirgan. U “jinoyatchi har doim jinoyat sodir bo‘lgan joyga intilishini” qayd etgan.
“Sivilizatsiyalashgan dunyo mamlakatlari ’urush rejissori’ (Putin) chegarani kesib o‘tsa, hibsga olinishini e’lon qilayotgan bir paytda, minglab Mariupol oilalarining qotillik tashkilotchisi shahar vayronalari va ommaviy qabrlarni tomosha qilish uchun keldi”, — degan Podolyak.
Ukraina Mudofaa vazirligi esa “Putin xuddi o‘g‘ridek tunda Mariupolga tashrif buyurganini” qayd etgan. Ayrimlar Putinning Mariupolga tashrifini Xalqaro jinoiy sudning uni hibsga olish orderiga javob ekanini bildirgan.
Kreml matbuot kotibi Dmitriy Peskov esa Rossiya prezidenti rus harbiylari tomonidan bosib olingan Mariupolga uning qayta tiklanganiga ishonch hosil qilish uchun borganini aytgan.
Izoh (0)