Qashqadaryoda buyum bozoridagi do‘konlarda yong‘in chiqdi (video)

Qashqadaryo viloyati Chiroqchi tumanida joylashgan buyum bozoridagi do‘konlarda yong‘in chiqdi, deb xabar beradi viloyat FVB matbuot xizmati.

Qayd etilishicha, 17-aprel kuni tongi soat 00:33 larda tuman FVBga “Chiroqchi” MFYda joylashgan “Sarbon Barakasi” MChJ buyum bozori yonida yong‘in sodir bo‘layotgani tog‘risida xabar kelib tushgan.

Xabarga ko‘ra tuman FVBdan 3 ta yong‘in-qutqaruv bo‘linmasi voqea joyiga soat 00:36 larda yetib borgan va yong‘in to‘liq 01:20 da o‘chirilgan. Yong‘in oqibatida yakka tartibdagi tadbirkorlarga tegishli ikkita savdo do‘konining jami 60 kvadrat metr maydonda ichki va tom qismi yongan, shuningdek, do‘konlardagi savdo mollari ham zararlangan.

“Yong‘in-qutqaruvchilarining tezkorligi natijasida yong‘indan savdo do‘konlariga yondosh bo‘lgan 20 tadan ortiq do‘konlar asrab qolindi”, — deyiladi xabarda.

Yong‘indan tan jarohati olganlar yo‘q, hozirda yong‘in sabablari va zararlari aniqlanmoqda.

Bir necha kun oldin Navoiyda 3 qavatli qurilish mollari savdo markazida yong‘in chiqqani to‘g‘risida xabar berilgandi. Mart oxirlarida Toshkentning Shayxontohur tumanida plastmassa mahsulotlarini saqlash omborida yong‘in yuz bergani ma’lum qilingandi. Shuningdek, Andijondagi ko‘p qavatli uyda yong‘in chiqqani, Xorazmdagi paxta zavodida yong‘in sodir bo‘lgani to‘g‘risida xabar berilgandi.