O‘zLiDeP: Inson qadri ulug‘langan qomus

Konstitutsiyaviy qonun loyihasining mazmun-mohiyatini tushuntirishga qaratilgan tashviqot tadbirlarining navbatdagisi Sirdaryo viloyati Guliston shahridagi Saxovat gipermarketida tashkil qilindi.

Tadbirda O‘zLiDeP Siyosiy Kengashi Ijroiya qo‘mitasi raisi Aktam Xaitov, partiya viloyat Kengashi apparat rahbari Shoxista Bozorboyeva, viloyat va shahar kengashi deputatlari, Yoshlar parlamentining viloyatdagi aʼzolari, faollar, talaba yoshlar va OAV vakillari ishtirok etdi.

O‘zLiDeP yetakchisi yangilanayotgan Konstitutsiyamizning ahamiyati hamda 30-aprel kuni o‘tkaziladigan referendum haqida so‘z yuritdi. Shu bilan bir qatorda hujjatda taʼlimga qaratilayotgan eʼtibor va belgilanayotgan normalarning kelgusida yosh avlod kamoloti va himoyasi borasida dolzarbligi xususida batafsil to‘xtaldi.

— Yangilanayotgan Konstitutsiyada inson manfaati, uning huquq va erkinliklarini kafolatlash birinchi o‘ringa qo‘yilmoqda, — dedi so‘z olgan Shoxista Bozorboyeva. — Loyiha xalq bilan bamaslahat, ularning takliflari inobatga olingan holda ishlab chiqilgani uchun ham xalqchil, davr talabiga javob beradigan hujjat yaratildi. Endi referendumda bunga xalqimiz o‘z munosabatini bildirishi kerak. Agar har bir yurtdoshimiz o‘zining bugungi hayoti va kelajagini o‘ylab ovoz berishda qatnashsa, biz mukammal, yangi O‘zbekistonga mos Bosh qonunga ega bo‘lamiz, albatta.

Yakunda deputat va partiya faollari ishtirokchilarni 30-aprel kuni bo‘lib o‘tadigan referendumda faol ishtirok etishga chaqirdi. Ko‘tarinki ruhda o‘tgan tadbirda viloyat madaniyat bo‘limi xonandalari, talabalar Vatan, tinchlik haqidagi qo‘shiqlarni ijro etib, ishtirokchilarga xush kayfiyat ulashdi.

O‘zLiDeP raisi Aktam Xaitov Guliston shahridagi “Ishga marhamat” mono markazida bo‘lib o‘tgan  konstitutsiyaviy qonun loyihasi targ‘iboti tadbirida ham qatnashdi.

Dastlab partiya yetakchisi markazda yaratilgan shart-sharoit va amalga oshirilayotgan ishlar bilan tanishdi. Shundan so‘ng markazda taʼlim olayotgan o‘quvchilar bilan ochiq muloqotga kirishildi.

Taʼkidlanganidek, yangi tahrirdagi Konstitutsiyaga kiritilayotgan konseptual o‘zgartishlar tufayli, hech kim eʼtibordan chetda qolmaydi, o‘z muammolari bilan yolg‘iz tashlab qo‘yilmaydigan ijtimoiy davlat barpo etilishi muqarrar.

Mamlakatimizda oxirgi yillarda ishsiz va band bo‘lmagan aholini kasbga o‘qitish, qayta o‘qitish va malakasini oshirish, ularning ijtimoiy-siyosiy faolligini oshirish, taʼlim olishlari, kasb-hunar o‘rganishlari uchun shart-sharoitlarni yaratish, bandligini taʼminlash, tadbirkorlik faoliyatini yanada rivojlantirish borasida keng ko‘lamli islohotlar amalga oshirilgan bo‘lsa, endilikda bu jarayonlar yangi tahrirda tayyorlanib, umumxalq muhokamasiga havola etilgan Konstitutsiya bilan mustahkamlanmoqda.

Yangi tahrirdagi Konstitutsiya loyihasida davlat fuqarolarning bandligini taʼminlash, ularni ishsizlikdan himoya qilish, shuningdek, kambag‘allikni qisqartirish choralarini ko‘rish singari masʼuliyatni ham o‘z zimmasiga olayotgani eʼtiborga molik jihatlardan biridir, — dedi partiya lideri. — Qolaversa, yangilanayotgan Qomusda davlat fuqarolarning kasbiy tayyorgarligi va qayta tayyorlanishini tashkil etishi hamda rag‘batlantirishi aks ettirilayotgani aytib o‘tilgan.

Bu yangi norma ish bilan taʼminlanmagan fuqarolarni kambag‘allik holatiga tushib qolishining oldini olish yoki kambag‘allik toifasiga kirib qolgan fuqarolarni undan chiqarish bo‘yicha davlat tomonidan tegishli choralar ko‘rilishiga konstitutsiyaviy kafolat sifatida xizmat qiladi.

Targ‘ibot tadbirida ishtirok etgan markaz tinglovchilari ham mavzu doirasida o‘z fikrlarini bayon etisharkan, so‘nggi yillarda yurtimizda aholining ish bilan bandligini taʼminlash yo‘nalishida olib borilayotgan tub islohotlardan mamnunliklarini qayd etishib, umumxalq referendumida faol ishtirok etish har bir fuqaroning el-yurt oldidagi burchi ekanini taʼkidlashdi.

Elyor Jo‘rayev, O‘zLiDeP Sirdaryo viloyat kengashi bo‘lim mudiri