Конституциявий қонун лойиҳасининг мазмун-моҳиятини тушунтиришга қаратилган ташвиқот тадбирларининг навбатдагиси Сирдарё вилояти Гулистон шаҳридаги Саховат гипермаркетида ташкил қилинди.
Тадбирда ЎзЛиДеП Сиёсий Кенгаши Ижроия қўмитаси раиси Актам Хаитов, партия вилоят Кенгаши аппарат раҳбари Шохиста Бозорбоева, вилоят ва шаҳар кенгаши депутатлари, Ёшлар парламентининг вилоятдаги аъзолари, фаоллар, талаба ёшлар ва ОАВ вакиллари иштирок этди.
ЎзЛиДеП етакчиси янгиланаётган Конституциямизнинг аҳамияти ҳамда 30 апрель куни ўтказиладиган референдум ҳақида сўз юритди. Шу билан бир қаторда ҳужжатда таълимга қаратилаётган эътибор ва белгиланаётган нормаларнинг келгусида ёш авлод камолоти ва ҳимояси борасида долзарблиги хусусида батафсил тўхталди.
— Янгиланаётган Конституцияда инсон манфаати, унинг ҳуқуқ ва эркинликларини кафолатлаш биринчи ўринга қўйилмоқда, — деди сўз олган Шохиста Бозорбоева. — Лойиҳа халқ билан бамаслаҳат, уларнинг таклифлари инобатга олинган ҳолда ишлаб чиқилгани учун ҳам халқчил, давр талабига жавоб берадиган ҳужжат яратилди. Энди референдумда бунга халқимиз ўз муносабатини билдириши керак. Агар ҳар бир юртдошимиз ўзининг бугунги ҳаёти ва келажагини ўйлаб овоз беришда қатнашса, биз мукаммал, янги Ўзбекистонга мос Бош қонунга эга бўламиз, албатта.
Якунда депутат ва партия фаоллари иштирокчиларни 30 апрель куни бўлиб ўтадиган референдумда фаол иштирок этишга чақирди. Кўтаринки руҳда ўтган тадбирда вилоят маданият бўлими хонандалари, талабалар Ватан, тинчлик ҳақидаги қўшиқларни ижро этиб, иштирокчиларга хуш кайфият улашди.
ЎзЛиДеП раиси Актам Хаитов Гулистон шаҳридаги “Ишга марҳамат” моно марказида бўлиб ўтган конституциявий қонун лойиҳаси тарғиботи тадбирида ҳам қатнашди.
Дастлаб партия етакчиси марказда яратилган шарт-шароит ва амалга оширилаётган ишлар билан танишди. Шундан сўнг марказда таълим олаётган ўқувчилар билан очиқ мулоқотга киришилди.
Таъкидланганидек, янги таҳрирдаги Конституцияга киритилаётган консептуал ўзгартишлар туфайли, ҳеч ким эътибордан четда қолмайди, ўз муаммолари билан ёлғиз ташлаб қўйилмайдиган ижтимоий давлат барпо этилиши муқаррар.
Мамлакатимизда охирги йилларда ишсиз ва банд бўлмаган аҳолини касбга ўқитиш, қайта ўқитиш ва малакасини ошириш, уларнинг ижтимоий-сиёсий фаоллигини ошириш, таълим олишлари, касб-ҳунар ўрганишлари учун шарт-шароитларни яратиш, бандлигини таъминлаш, тадбиркорлик фаолиятини янада ривожлантириш борасида кенг кўламли ислоҳотлар амалга оширилган бўлса, эндиликда бу жараёнлар янги таҳрирда тайёрланиб, умумхалқ муҳокамасига ҳавола этилган Конституция билан мустаҳкамланмоқда.
.jpg)
Янги таҳрирдаги Конституция лойиҳасида давлат фуқароларнинг бандлигини таъминлаш, уларни ишсизликдан ҳимоя қилиш, шунингдек, камбағалликни қисқартириш чораларини кўриш сингари масъулиятни ҳам ўз зиммасига олаётгани эътиборга молик жиҳатлардан биридир, — деди партия лидери. — Қолаверса, янгиланаётган Қомусда давлат фуқароларнинг касбий тайёргарлиги ва қайта тайёрланишини ташкил этиши ҳамда рағбатлантириши акс эттирилаётгани айтиб ўтилган.
Бу янги норма иш билан таъминланмаган фуқароларни камбағаллик ҳолатига тушиб қолишининг олдини олиш ёки камбағаллик тоифасига кириб қолган фуқароларни ундан чиқариш бўйича давлат томонидан тегишли чоралар кўрилишига конституциявий кафолат сифатида хизмат қилади.
.jpg)
Тарғибот тадбирида иштирок этган марказ тингловчилари ҳам мавзу доирасида ўз фикрларини баён этишаркан, сўнгги йилларда юртимизда аҳолининг иш билан бандлигини таъминлаш йўналишида олиб борилаётган туб ислоҳотлардан мамнунликларини қайд этишиб, умумхалқ референдумида фаол иштирок этиш ҳар бир фуқаронинг эл-юрт олдидаги бурчи эканини таъкидлашди.
Элёр Жўраев, ЎзЛиДеП Сирдарё вилоят кенгаши бўлим мудири
Изоҳ (0)