Buxoroda 500 ming so‘m evaziga qo‘shmachilik qilgan ayol ushlandi

Buxoro tumanida qo‘shmachilik qilib, fuqarodan 500 ming so‘m pul olgan shaxs ushlandi, deb xabar beradi Buxoro viloyati IIB axborot xizmati.

Qayd etilishicha, 30-mart kuni soat 15:30 larda viloyat Ichki ishlar boshqarmasi xodimlari tomonidan “Buxoro shahar hududida fohishaxona saqlash borasidagi holatlar oldini olish va unga qarshi kurash” tadbiri o‘tkazilgan. Tadbir davomida Buxoro tumani “Urganjixona” qishlog‘ida yashovchi 35 yoshli R.H. “mijoz” sifatida borgan erkakka jinsiy aloqa qilishi uchun moddiy A.D. ismli ayolni topib berib, buning evaziga undan 500 ming so‘m naqd pul olib, qo‘shmachilik jinoyatini sodir etgani aniqlangan. 

Ma’lum bo‘lishicha, ushbu shaxs muqaddam Jinoyat kodeksining 135-moddasi (odam savdosi) 2-qismi bilan sudlangan.

Holat yuzasidan ushbu retsidiv ayolga nisbatan Jinoyat kodeksining 131-moddasi (qo‘shmachilik qilish yoki fohishaxona saqlash) 4-qismi bilan jinoyat ishi qo‘zg‘atilib, dastlabki tergov harakatlari olib borilmoqda.

Buxoro shahrida 1-aprel kuni 900 ming so‘mga fohishaxona tashkil qilgan ayol ushlangani to‘g‘risida xabar berilgandi. Shuningdek, mart oxirlarida G‘ijduvon tumanida qo‘shmachilik qilib, fuqarolardan 60 ming so‘m olgan shaxs qo‘lga olingan edi.