“Do‘stlik” chegara-bojxona postidan gashish giyohvandlik moddasini olib o‘tishga uringan fuqaro qo‘lga olindi. Bu haqda “Zamon” informatsion dasturida ma’lum qilindi.
Qayd etilishicha, Andijon viloyati Bojxona boshqarmasi “Do‘stlik” chegara-bojxona postidan o‘tayotgan fuqaroning xatti-harakati shubhali ko‘ringan va u mutaxassislar tomonidan alohida ko‘rikka jalb etilgan. Ko‘rik davomida u 491 gramm gashish giyohvandlik moddasini qorin qismiga bog‘lab olib o‘tishga uringani fosh bo‘lgan.
Hozirda holat yuzasidan tergovga qadar tekshiruv harakatlari olib borilmoqda.
Andijon viloyati Bojxona boshqarmasi inspektori Sardor O‘rinboyevga ko‘ra, 2023-yilning o‘tgan davri mobaynida 16 ta holatda jami 4 kilogramm 760 grammni tashkil qiluvchi giyohvand moddalarning noqonuniy aylanmasiga chek qo‘yilgan.
Mart oyi o‘rtalarida DXX Chegara qo‘shinlari va Namangan viloyati bo‘yicha boshqarmasi harbiy xizmatchilari tomonidan olib borilgan tezkor-qidiruv tadbirlarida katta miqdordagi narkotik moddalarning o‘zbek—qirg‘iz davlat chegarasidan noqonuniy o‘tkazilgan holati aniqlangandi.
Shuningdek, Navoiy viloyatida narkotik moddalar savdosi bilan shug‘ullanuvchi jinoiy guruh qo‘lga olingani, Toshkentda giyohvand moddalar savdosi bilan shug‘ullangan talabalar ushlangani, shuningdek, Samarqanddagi tungi klubda 10 ming AQSH dollari evaziga giyohvand modda sotishga uringanlar qo‘lga tushgani to‘g‘risida xabar berilgandi.
Izoh (0)