AQSH prezidenti Jo Bayden navbatdagi prezidentlik saylovlarida ishtirok etishga qaror qildi. U tez orada saylovoldi kampaniyasi haqida e’lon qilishga va’da berdi.
“Men buning hisob-kitobini allaqachon qilganman. Tez orada bu haqda e’lon qilamiz. Safarim nima qilish mumkinligi borasida nekbinligimni yanada oshirdi. Sizga aytdim, mening rejam — yana qatnashish”, — dedi Bayden Dublinni tark etishdan oldin jurnalistlarga.
Bu orada AQSH sobiq davlat kotibi Mayk Pompeo Respublikachilar partiyasidan 2024-yilgi saylovda qatnashmasligini aytdi. U o‘z qarorini Fox News telekanaliga bergan intervyusida ma’lum qildi.
“Men qaror qabul qildim. Biz 2024-yildagi saylovda qatnashmaydigan bo‘ldik. Amerika haqida va men so‘nggi bir yarim yil davomida, aniqrog‘i o‘nlab yillar davomida gapirib kelayotgan masalalar haqida chuqur qayg‘ursak ham, hali bizning vaqtimiz kelmaganini tushunish kerak”, — dedi Pompeo.
Bu qaror ilgari uning boshlig‘i bo‘lgan sobiq prezident Donald Trampning saylovdagi ishtiroki bilan bog‘liqmi, degan savolga Pompeo inkor javobini berdi, so‘ng respublikachilardan har qanday nomzodni to‘liq qo‘llab-quvvatlashini qo‘shimcha qildi. U saylovda ishtirok etishdan bosh tortganini oilaviy sharoit bilan izohladi.
2021-yilda Pompeo, agar Tramp prezidentlik uchun kurashishdan bosh tortsa, saylovda o‘z nomzodini qo‘yish niyati haqida ma’lum qilgandi. O‘shanda u AQSH kelajagidan juda xavotirda ekani va konservativ qarashlarga amal qilishni rejalashtirayotganini aytgan.
Pompeo 2018-yildan 2021-yilgacha Trampning davlat kotibi bo‘lgan.
AQSHda kelgusi prezidentlik saylovi 2024-yil 5-noyabrga belgilangan. Tramp unda ishtirok etishi haqida allaqachon e’lon qilgan.
Izoh (0)