Finlyandiya hukumati Rossiya bilan chegarada panjarali devorning birinchi 75 kilometrlik qismini qurishga tayyorlanmoqda, deb xabar berdi Reuters.
Finlyandiya tomoni qurilishni noqonuniy migratsiyaga qarshi kurash va o‘z xavfsizligini oshirish bilan izohlamoqda.
Devor 2026-yilgacha 200 kilometr uzunlikda bo‘ladi.
Devorning balandligi uch metr, tepasida tikanli sim o‘rnatiladi. Panjara tungi videokuzatuv rejimi, muhim hududlarda yoritish chiroqlari va dinamiklar bilan jihozlanadi.
Avvalroq Finlyandiya prezidenti Sauli Niinistyo NATOga a’zo bo‘lish “barcha muammolarni hal etolmasligini” aytgandi. Finlyandiya rahbarining taʼkidlashicha, mamlakat Shimoliy Atlantika alyansiga qo‘shilganidan keyin ham “o‘z xavfsizligi uchun asosiy masʼuliyatni o‘zi zimmasiga oladi”, shuning uchun “qayerda bo‘shliq yoki zaiflik topilsa, ularni to‘ldirib, mustahkamlash kerak”.
4-aprel kuni Finlyandiya rasman NATOga qo‘shildi va uning 31-aʼzosiga aylandi.
Rossiya bilan 1 340 kilometrlik chegaraga ega Finlyandiya Rossiyaning Ukrainaga keng ko‘lamli bosqinidan keyin mintaqaviy xavfsizlik masalalariga eʼtiborini kuchaytirgan.
Izoh (0)