Activist nomi bilan tanilgan bloger Hojiakbar Nosirov 5-aprel kuni yogurtlar harom ekani to‘g‘risidagi videoni ijtimoiy tarmoqqa joylashtirgani ortidan 15 sutkaga qamalgani haqida xabar berilgandi. Toshkent shahar sudlarining ma’lum qilishicha, bloger Hojiakbar Nosirov sudga advokati kiritgan apellyatsiya shikoyatini ko‘rmasdan qoldirishni so‘rab ariza yozgan.
Qayd etilishicha, mazkur ish bo‘yicha 14-aprel kuni Toshkent shahar sudining jinoyat ishlari bo‘yicha sudlov hayʼati apellyatsiya instansiyasiga huquqbuzar Hojiakbar Nosirovning advokati S.Ishpulatov tomonidan apellyatsiya shikoyati kelib tushgan.
Sud majlisi 14-aprel soat 15:00 ga tayinlangan. Hojiakbar Nosirov tomonidan advokatning shikoyatini ko‘rmasdan qoldirish haqidagi ariza keltirilgani sababli, Ma’muriy javobgarlik to‘g‘risidagi kodeksning 324-4 (apellyatsiya shikoyatini qaytarib olish) va 324-8-moddalariga (apellyatsiya instansiyasi sudining vakolatlari) asosan, apellyatsiya shikoyatini ko‘rmasdan qoldirib, apellyatsiya tartibida ish yuritishni tugatish haqida qaror chiqarilgan.
Activist ishi
Unga nisbatan 8-aprel kuni jinoyat ishlari bo‘yicha Shayxontohur tuman sudida Maʼmuriy javobgarlik to‘g‘risidagi kodeksning 184-3-moddasi (milliy, irqiy, etnik yoki diniy adovatni targ‘ib qiluvchi materiallarni tayyorlash, saqlash yoki tarqatish) va 194-moddasi (ichki ishlar organlari xodimining qonuniy talablarini bajarmaslik) 1-qismi bo‘yicha yuritilgan maʼmuriy ish ko‘rib chiqilgandi.
Shayxontohur tumani Ichki ishlar organlari faoliyatini muvofiqlashtirish bo‘limi TQKB xodimlari tomonidan Toshkent shahrida diniy muhitni sog‘lomlashtirish borasida olib borilayotgan ijtimoiy tarmoqlarda monitoring tadbirlari davomida, u o‘ziga tegishli bo‘lgan Activist kanali orqali har xil turdagi diniy mazmundagi videolarni, yaʼni Din ishlari bo‘yicha qo‘mitaning 2023-yil 7-apreldagi xulosasiga asosan aholi orasida turli ixtilof va tushunmovchiliklar keltirib chiqarishi mumkin bo‘lgan g‘oyalarni tarqatgani aniqlangan.
Bundan tashqari, ish hujjatlariga ko‘ra, bloger IIO xodimlarining hujjatlarini tekshirish uchun taqdim etish, tushuntirish berish va ish hujjatlari bilan tanishib chiqish kabi qonuniy talablarga bo‘ysunmagan. Unga sud majlisida huquqbuzar tariqasida so‘roq qilish uchun so‘z berilganida huquqbuzar va himoyachisi holat yuzasidan ko‘rsatma berishdan bosh tortdi.
U ko‘rsatma berishdan bosh tortgan bo‘lsa-da, uning yuqoridagi huquqbuzarliklarni sodir etgani ish hujjatlaridagi IIO FMB xodimining bildirgisi, dalolatnoma, ko‘zdan kechirish va elektron materiallarni olish bayonnomasi, Activist kanalidan olingan fotolavhalar, DVD-R diskidagi videolavhalar, ashyoviy dalillarni olish bayonnomasi, hamda Din ishlari bo‘yicha qo‘mitaning ekspertlik xulosasi va boshqa dalillar bilan o‘z tasdig‘ini topgan.
Sud qarori bilan X.N. Maʼmuriy javobgarlik to‘g‘risidagi kodeksning 184-3-moddasi va 194-moddasi 1-qismida nazarda tutilgan huquqbuzarlikni sodir etganlikda aybli deb topilib, unga nisbatan 15 sutka maʼmuriy qamoq jazosi tayinlangan edi.
Izoh (1)
Bir narsa deyishga ham hayronsan