“O‘zgidromet” xabariga ko‘ra, 14-aprel, juma kuni respublikaning shimoli-g‘arbiy hududlariga Turkmaniston orqali Kaspiy dengizidan salqin va nam havo massalari kirib keladi.
Shanba kuni salqin va nam havo massalarining kirib kelishi sharq tomonga qarab harakatlanadi. O‘zbekiston bo‘yicha ba’zi joylarda yomg‘ir yog‘adi, momaqaldiroq bo‘ladi, ayrim joylarda do‘l yog‘ishi mumkin. Buxoro, Navoiy, Qashqadaryo viloyatlarida faqat kechasi va ertalab momaqaldiroqli yomg‘irlar saqlanib turadi. Qoraqalpog‘iston Respublikasi, Xorazm, Surxondaryo viloyatlarida yog‘ingarchilik kuzatilmaydi. Kunduzgi havo harorati 20-25 darajagacha pasayadi.
Yakshanba kuni respublikada yog‘ingarchilik kutilmaydi, faqat Toshkent viloyati va Farg‘ona vodiysi viloyatlarining ba’zi joylarida yomg‘ir yog‘ishi, momaqaldiroq bo‘lishi mumkin. Havo harorati kechasi 10-15 darajani, kunduzi 20-25 darajani tashkil etadi. Shimolda harorat pasayib, kechasi 0-5 daraja, kunduzi 7-12 daraja bo‘ladi.
Respublika bo‘yicha ba’zi joylarda shamol tezligi 17-22 metr/sekundgacha kuchayishi kutilmoqda, ba’zida esa 25-28 metr/sekundgacha kuchayishi mumkin.
Respublikaning tog‘oldi va tog‘li hududlarida vaqti-vaqti bilan yomg‘ir yog‘adi, dam olish kunlari ba’zi joylarda qorga aylanadi. Sel-suv toshqini yuzaga kelishi mumkin.
Toshkentda shanba kuni vaqti-vaqti bilan yomg‘ir yog‘adi, momaqaldiroq bo‘ladi, do‘l yog‘ishi mumkin. Sharqiy shamol yo‘nalishini o‘zgartirib, g‘arbdan 5-10 metr/sekund tezlikda esib, 12-17 metr/sekundgacha kuchayishi mumkin. Yakshanba kuni kechga tomon biroz yomg‘ir yog‘adi. Dam olish kunlari harorat kechalari 11-13 darajani tashkil etadi, kunduz kunlari 21-23 daraja atrofida bo‘ladi.
Izoh (0)