Toshkentda 14-aprel kuni O‘zbekiston—Hindiston xalqaro sog‘liqni saqlash forumi o‘tkazilib, uning yakunida umumiy qiymati 300 million dollarga teng 100 dan ortiq memorandum va shartnomalar imzolandi. Bu haqda Sog‘liqni saqlash vazirligi xabar berdi.
Anjumanda ikki mamlakatning sog‘liqni saqlash sohasi masʼullari, diplomatik korpus vakillari, Hindistonning yetakchi xususiy tibbiyot markazlari hamda yirik farmatsevtik korxona rahbarlari ishtirok etdi.
Ta’kidlanishicha, Hindiston tibbiyoti dunyo reytingida yuqori o‘rinlardan birini egallaydi. Shu bois bu yerda tibbiyot turizmi jadal rivojlanmoqda. Yuqori texnologik operatsiyalar, sohaga innovatsion texnologiyalarni jalb qilish yo‘nalishlarida hind mutaxassislaridan o‘rganadigan jihatlar ko‘p. Shundan kelib chiqqan holda, keyingi yillarda hindistonlik hamkorlar bilan birgalikda O‘zbekistonda qator loyihalar amalga oshirilmoqda.
Xususan, bu davlatning yirik va nufuzli klinikalari bilan birgalikda 10 dan ziyod tibbiyot muassasalari faoliyati yo‘lga qo‘yilgan. 2022-yilda Nephrocare Health kompaniyasi bilan davlat-xususiy sheriklik asosida Nukus shahrida 150 o‘rinli, Bog‘ot va Urganch tumanlarida 250 o‘rinli gemodializ markazlari ishga tushirilib, 12 mln dollar miqdorida investitsiya kiritildi. Ushbu kompaniya kuni kecha Toshkent shahrida ham 160 o‘rinli gemodializ markazini ishga tushirdi.
Bundan tashqari, 2020-yildan buyon Samarqand shahrida 10 mln dollarlik investitsiya hisobiga tashkil etilgan Zarmet Pratiksha’ning 180 o‘rinli klinikasi faoliyat olib bormoqda. 2022-yilda 10 million dollar sarmoya hisobiga AAKASH kompaniyasi 100 o‘rinli klinikasini ochdi. 2023-yilda Dehli va Haydarobod shaharlarida Toshkent tibbiyot akademiyasining vakolatxonalari ochildi. Har yili 200 dan ortiq o‘zbekistonlik mutaxassislar Hindistonning yetakchi klinikalarida malaka oshirib qaytmoqda.
Xabarda aytilishicha, Shavkat Mirziyoyevning 2022-yil 27-yanvar kuni bo‘lib o‘tgan Hindiston—Markaziy Osiyo birinchi sammitida Hindiston bilan taʼlim va sog‘liqni saqlash sohalarida faol hamkorlik qilish orqali, bu mamlakatning ilg‘or tajribasi, bilim va texnologiyalarini keng joriy qilish asosida inson kapitalini rivojlantirishni eng birinchi strategik ustuvor yo‘nalish sifatida eʼtirof etgandi.
Izoh (0)