Jizzax va Guliston shaharlarida havoni monitoring qiluvchi avtomatik stansiyalar o‘rnatildi, deb xabar beradi “Zamin” fondi axborot xizmati.
Qayd etilishicha, “Zamin” fondi va Gidrometeorologiya xizmati agentligining qo‘shma loyihasi doirasida O‘zbekiston hududlarida o‘rnatish uchun mo‘ljallangan 6 ta havoni monitoring qilish avtomatik stansiyasi olib kelingan. Ulardan ikkitasi Jizzax va Gulistonga yetkazilib, o‘rnatilgan.
“Ayni paytda mutaxassislar stansiyalarni sozlamoqda va sinov tariqasida ishga tushirmoqda, shundan so‘ng havoning holati to‘g‘risidagi ma‘lumotlar real vaqt rejimida ‘Monitoring.meteo.uz’ platformasida taqdim etib boriladi”, — deyiladi xabarda.
Stansiyalarni ishga tushirishdan avval “O‘zgidromet”ning joylardagi xodimlari uchun o‘rnatilayotgan stansiyalarni sozlash va ulardan foydalanish bo‘yicha amaliy treninglar o‘tkazilmoqda.
2022-yil sentabrda Xalqaro moviy osmon uchun toza havo kuni arafasida “Zamin” fondi tomonidan BMTning Atrof-muhitni muhofaza qilish dasturi (UNEP), O‘zbekiston Gidrometeorologiya xizmati markazi va Davlat ekologiya qo‘mitasi ko‘magida “Toza havoning inson hayoti sifati uchun ahamiyati” mavzusida muhokama o‘tkazilgandi.
O‘shanda tadbir ishtirokchilari havo sifati bo‘yicha me’yorlarni qo‘llash borasidagi xalqaro tajriba bilan tanishgan hamda monitoring yakunida havoni nazorat qilish chora-tadbirlarini eng namunali xalqaro amaliyotga muvofiq holda birgalikda takomillashtirishga kelishib olgan edi.
Izoh (0)