O‘zbekistonga 15—17-aprel kunlari sovuq va nam havo massalari kirib keladi. Bu haqda O‘zgidromet direktori o‘z Facebook sahifasida maʼlum qildi.
Unga ko‘ra, 15-aprelda respublika hududida, 16-aprelda Toshkent viloyati va Farg‘ona vodiysi viloyatlarida baʼzi joylarda yomg‘ir yog‘adi, momaqaldiroq bo‘lishi mumkin, ayrim joylarda do‘l yog‘ishi mumkin. 15—17-aprelda respublika hududi bo‘yicha baʼzi joylarda shamol tezligi 17-22 metr/sekundgacha kuchayishi, ayrim joylarda chang-to‘zon bilan kuzatilishi kutilmoqda.
Qoraqalpog‘iston, Xorazm, Buxoro, Navoiy, Farg‘ona viloyatlarida 25-28 metr/sekundgacha kuchayishi mumkin. 17-aprelga havo harorati kechasi 2-7 darajagacha iliq, kunduzi 10-15 darajagacha iliq bo‘ladi. 16—17-aprel kunlari Qoraqalpog‘iston, Xorazm viloyati va Navoiy viloyati shimolida harorat 0-5 darajagacha iliq, baʼzi joylarda -1-3 darajagacha sovuq bo‘lishi mumkin, kunduz kunlari 7-12 darajagacha iliq bo‘ladi.
Shuningdek, 15—17-aprel kunlari respublikaning tog‘oldi va tog‘li hududlarida yog‘ingarchilik (yomg‘ir yog‘adi, baland tog‘larda qorga aylanadi) bo‘ladi, sel-suv toshqin hodisalari yuzaga kelishi mumkin. Tog‘oldi va tog‘li hududlarda yashovchi fuqarolar, dam oluvchilar va haydovchilardan ehtiyot choralariga rioya etish so‘ralgan.
Izoh (0)