Toshkent viloyati Qibray tumanida 1876-yilda chiqarilgan oltin tangalarni 145 ming dollarga sotayotgan shaxslar ushlandi. Bu haqda Iqtisodiy jinoyatlarga qarshi kurashish departamenti axborot xizmati xabar berdi.
Xabarga ko‘ra, holat Bosh prokuratura huzuridagi departamentning Qibray tuman bo‘limi tomonidan DXX xodimlari bilan hamkorlikda o‘tkazilgan tezkor tadbirda aniqlandi. Fuqarolar B.A. va M.U. 1876-yilda ishlab chiqarilgan “Gosudarinya imperatritsa Mariya Fyodorovna” va “25 rubley” yozuvlari tushirilgan umumiy og‘irligi 76,2 gramm bo‘lgan 2 dona oltin tangani 145 000 dollarga sotayotgan vaqtlarida ashyoviy dalillar bilan ushlangan.
Mazkur holat yuzasidan Jinoyat kodeksining 177-moddasi (valyuta qimmatliklarini qonunga xilof ravishda olish yoki o‘tkazish) bilan jinoyat ishi qo‘zg‘atilib, tergov harakatlari o‘tkazilmoqda.
Izoh (0)