Farg‘ona viloyati Uchko‘prik tumani tibbiyot birlashmasi boshlig‘i Bahodir Oripov “Daryo” muxbiri bilan suhbatda tibbiyot xodimlarining paxta dalasida o‘tgan umri haqida gapirib, bugun ularning mehnati qadrlanayotganini, shifokorning paxta dalasidan qaytarilgani soha xodimlariga yaxshi imkoniyat berayotganini aytmoqda.
Shifokorlar paxtaga jalb qilinmaydi degan xabar ertakdek tuyulgandi
“1999-yilda tibbiyot sohasida ish boshlaganman. Qariyb 10 yildan beri rahbarlik lavozimlarida faoliyat yuritaman. Tibbiyot xodimlari paxtaga jalb qilinmaydi degan xabarni eshitganimda bu gaplar ertakdek tuyulgandi. Bunday bo‘lishi mumkin emas, tibbiyot xodimlari va o‘qituvchilarsiz paxta terishni eplasholmaydi, baribir bizni yana chiqarishadi deb o‘ylaganman. Vaqt o‘tib, o‘z ko‘zimiz bilan ko‘rib keyin ishondik. Mana tibbiyot xodimlari terimga chiqmasa ham dalalarda paxta qolib ketmas ekan”, — deydi shifokor Bahodir Oripov.
Tumandagi tibbiyot xodimlarining 70 foizi bir vaqtda paxta dalasiga quvilgan
Uchko‘prik tumanida faoliyat yurituvchi bosh shifokorning aytishicha, o‘sha kezlarda tumandagi 70 foiz tibbiyot xodimi paxta dalasiga quvilgan.
“Tibbiyot birlashmasi tarkibidagi muassasalarda 2 ming 800 nafardan ortiq xodim ishlagan bo‘lsa, ularning deyarli 70 foizi bir vaqtda to‘liq paxta terimiga jalb qilinardi. Endi tasavvur qiling, bitta tumandagi tibbiyot xodimlarining yarmidan ko‘pi paxta dalalarida yursa, aholiga kim tibbiy xizmat ko‘rsatardi, bemorlarni kim davolardi? Shifokor va hamshiralar yetishmay qolardi, bemorlar sarson, tibbiy xizmat sifati qanday bo‘lishini tasavvur qilavering”, — deydi u.
Qor yog‘ganda ham paxta terganmiz
“Oq xalat kiyib, xalqimizga xizmat ko‘rsatamiz, bemorlarni davolaymiz deb yillar davomida o‘qib, oliy maʼlumot olgan shifokorlarning vaqti paxta dalalarida o‘tardi. Cho‘llarda yotoqxonalar tashkil qilinardi. Shifokor va o‘rta tibbiyot xodimlarimiz shu yotoqxonalarda yashab, paxta terishgan. Avgustdan terimga tayyorgarlik ko‘rardik. Avgust, sentabrda terimga chiqib ketib, shu bilan havolar sovib, qor yog‘ganda qaytardik. Hatto qor yog‘gan paytlarda ham paxta terganmiz. Ikki kishi arqon tortib yurib, g‘o‘zalardagi qorni tushirib chiqardi. Qolganlar qordan tozalangan paxtani terishardi. Shunday kunlarni ham ko‘rdik”, — deydi bosh shifokor.
Shifokorning majburiy mehnati tibbiy xizmat sifatining tushib ketishiga sabab bo‘lgan
“Prezidentimiz boshlab bergan tashabbus sabab endi tibbiyot xodimlari ham qadrlana boshladi. Bunga birdaniga erishilgani yo‘q. Yaqin-yaqingacha avvalgi davrlardan meros qolgan majburiy mehnat avjiga chiqqan edi. Shifokorlar-u hamshiralar paxta yig‘im-terimi va boshqa mavsumiy ishlarga jalb qilinar, buning natijasida aholiga tibbiy xizmat ko‘rsatish sifati tushib ketgandi”, — deydi u.
"Menimcha" ko‘rsatuvining efirga uzatilgan navbatdagi sonida uzoq yillik paxta siyosati o‘zbek millatini ne ko‘ylarga solgani haqida so‘z bordi va unda ko‘rsatuv muallifi Cotton Campaign tomonidan O‘zbekiston paxtasiga qo‘yilgan 12 yillik boykot bekor bo‘lganiga bir yil to‘lganini yodga oldi.
Izoh (0)