O‘zbekiston elchixonasi xodimlari Malayziyaning Gemilang Coachwork Sdn. Bhd kompaniyasining ijrochi direktori Pang Chong Yong bilan uchrashuv o‘tkazdi. Bu haqda “Dunyo” agentligi xabar berdi.
Uchrashuvda Malayziya kompaniyasi va “O‘zavtosanoat” AJ tarkibidagi korxonalari o‘rtasida o‘zaro hamkorlikni yanada chuqurlashtirish istiqbollari muhokama qilingan.
Gemilang Coachwork Sdn. Bhd kompaniyasining ijrochi direktori Pang Chong Yong O‘zbekistonning Uz Truck and Bus Motors QK MCHJ bilan o‘zaro hamkorlik holatidan mamnun ekanini bildirgan. Suhbatdosh kelgusida “Samavto” MCHJ korxonasi bilan korxona ehtiyojlari uchun alyuminiy kuzovlar yetkazib berish va birgalikda elektro avtobuslar ishlab chiqarish imkoniyatlarini o‘rganishga qiziqish bildirgan.
Uchrashuv natijasida Malayziya kompaniyasi bilan “O‘zavtosanoat” AJ o‘rtasida hamkorlik istiqbollarini muhokama qilish va “Samavto” MCHJ negizida elektro avtobuslar ishlab chiqarish imkoniyatlarini o‘rganish bo‘yicha onlayn muzokaralar o‘tkazish yuzasidan kelishib olingan.
1992-yilda tashkil etilgan bosh qarorgoh Malayziyaning Johor shtatida joylashgan Gemilang Coachwork Sdn. Bhd. avtobuslar va butlovchi qismlar ishlab chiqarish bilan shug‘ullanadi. Yillik ishlab chiqarish hajmi mingga yaqin avtobus va kuzovni tashkil etadi. Korxona mahsulotlari AQSH, Yevropa, Janubi-Sharqiy Osiyo va O‘zbekistonga eksport qilinadi. Mazkur kompaniya va Uz Truck and Bus Motors QK MCHJ o‘rtasida 2015-yilda hamkorlik o‘rnatilgan. Hamkorlik doirasida malayziya kompaniyasi tomonidan mamlakatimizga MAN avtobuslari uchun 350 ta kuzovlar yetkazib berilgan.
Avvalroq O‘zbekiston Oliy taʼlim, fan va innovatsiyalar vazirligi, “‘Navoiy’ Maxsus iqtisodiy zona direksiyasi” vakillari va Malayziyaning uchuvchisiz boshqariladigan apparatlarni (dronlar) ishlab chiqarishga ixtisoslashgan bir qator yetakchi kompaniyalari o‘rtasida onlayn uchrashuvlar tashkil etilgani to‘g‘risida xabar berilgandi.
Izoh (0)