Фарғона вилояти Учкўприк тумани тиббиёт бирлашмаси бошлиғи Баҳодир Орипов “Дарё” мухбири билан суҳбатда тиббиёт ходимларининг пахта даласида ўтган умри ҳақида гапириб, бугун уларнинг меҳнати қадрланаётганини, шифокорнинг пахта даласидан қайтарилгани соҳа ходимларига яхши имконият бераётганини айтмоқда.
Шифокорлар пахтага жалб қилинмайди деган хабар эртакдек туюлганди
“1999 йилда тиббиёт соҳасида иш бошлаганман. Қарийб 10 йилдан бери раҳбарлик лавозимларида фаолият юритаман. Тиббиёт ходимлари пахтага жалб қилинмайди деган хабарни эшитганимда бу гаплар эртакдек туюлганди. Бундай бўлиши мумкин эмас, тиббиёт ходимлари ва ўқитувчиларсиз пахта теришни эплашолмайди, барибир бизни яна чиқаришади деб ўйлаганман. Вақт ўтиб, ўз кўзимиз билан кўриб кейин ишондик. Мана тиббиёт ходимлари теримга чиқмаса ҳам далаларда пахта қолиб кетмас экан”, — дейди шифокор Баҳодир Орипов.
Тумандаги тиббиёт ходимларининг 70 фоизи бир вақтда пахта даласига қувилган
Учкўприк туманида фаолият юритувчи бош шифокорнинг айтишича, ўша кезларда тумандаги 70 фоиз тиббиёт ходими пахта даласига қувилган.
“Тиббиёт бирлашмаси таркибидаги муассасаларда 2 минг 800 нафардан ортиқ ходим ишлаган бўлса, уларнинг деярли 70 фоизи бир вақтда тўлиқ пахта теримига жалб қилинарди. Энди тасаввур қилинг, битта тумандаги тиббиёт ходимларининг ярмидан кўпи пахта далаларида юрса, аҳолига ким тиббий хизмат кўрсатарди, беморларни ким даволарди? Шифокор ва ҳамширалар етишмай қоларди, беморлар сарсон, тиббий хизмат сифати қандай бўлишини тасаввур қилаверинг”, — дейди у.
Қор ёққанда ҳам пахта терганмиз
“Оқ халат кийиб, халқимизга хизмат кўрсатамиз, беморларни даволаймиз деб йиллар давомида ўқиб, олий маълумот олган шифокорларнинг вақти пахта далаларида ўтарди. Чўлларда ётоқхоналар ташкил қилинарди. Шифокор ва ўрта тиббиёт ходимларимиз шу ётоқхоналарда яшаб, пахта теришган. Августдан теримга тайёргарлик кўрардик. Август, сентябрда теримга чиқиб кетиб, шу билан ҳаволар совиб, қор ёққанда қайтардик. Ҳатто қор ёққан пайтларда ҳам пахта терганмиз. Икки киши арқон тортиб юриб, ғўзалардаги қорни тушириб чиқарди. Қолганлар қордан тозаланган пахтани теришарди. Шундай кунларни ҳам кўрдик”, — дейди бош шифокор.
Шифокорнинг мажбурий меҳнати тиббий хизмат сифатининг тушиб кетишига сабаб бўлган
“Президентимиз бошлаб берган ташаббус сабаб энди тиббиёт ходимлари ҳам қадрлана бошлади. Бунга бирданига эришилгани йўқ. Яқин-яқингача аввалги даврлардан мерос қолган мажбурий меҳнат авжига чиққан эди. Шифокорлар-у ҳамширалар пахта йиғим-терими ва бошқа мавсумий ишларга жалб қилинар, бунинг натижасида аҳолига тиббий хизмат кўрсатиш сифати тушиб кетганди”, — дейди у.
"Менимча" кўрсатувининг эфирга узатилган навбатдаги сонида узоқ йиллик пахта сиёсати ўзбек миллатини не кўйларга солгани ҳақида сўз борди ва унда кўрсатув муаллифи Cоtton Campаign томонидан Ўзбекистон пахтасига қўйилган 12 йиллик бойкот бекор бўлганига бир йил тўлганини ёдга олди.
Изоҳ (0)