Prezident tomonidan imzolangan qonun bilan “Isteʼmol krediti to‘g‘risida”gi qonunga o‘zgartish kiritildi, deb xabar beradi Telegram’dagi “Huquqiy axborot” kanali.
Kiritilgan o‘zgartishga ko‘ra:
- Moliyaviy isteʼmol kreditidan foydalanishda shartnoma tovarni (xizmatni) isteʼmolchi tomonidan sotib olishga doir shartnoma kuchga kirguniga qadar yoki kuchga kirganidan keyin tuzilishi mumkin;
- Moliyaviy isteʼmol krediti berish isteʼmol tovarlarini (xizmatlarni) ishlab chiqaruvchining yoki realizatsiya qiluvchi subyektning (yuridik va jismoniy shaxsning) bankdagi hisobvarag‘iga bank yoxud boshqa kredit tashkiloti tomonidan pul mablag‘lari o‘tkazish yo‘li bilan amalga oshiriladi.
Moliyaviy isteʼmol kreditining naqd pulda berilishiga yo‘l qo‘yilmaydi.
Shuningdek, mazkur qonun bilan O‘zbekistonda isteʼmol krediti mamlakatda ishlab chiqarilmagan mahsulotlar va xizmatlar uchun ham beriladigan bo‘ldi.
Ta’kidlash kerakki, shu paytga qadar mamlakatda isteʼmol krediti faqatgina mahalliy tovar va xizmatlar uchun berilar edi. Bu esa aholining turli usullar bilan ushbu cheklovlarni “aylanib o‘tishiga” sabab bo‘ladi.
“Ushbu o‘zgarish moliyaviy isteʼmol krediti berish tartibini takomillashtirish va soddalashtirishga, shuningdek, isteʼmolchi fuqarolar uchun qo‘shimcha imkoniyatlar yaratishga va xususiy tadbirkorlikni yanada rivojlantirishga xizmat qiladi”, — deyiladi hujjat matnida.
Bu odamlarga nima beradi?
Mamlakat banklarida iste’mol krediti mikroqarzga nisbatan pastroq foizda ajratiladi. O‘zbekistonliklar mikroqarzni banklardan 50 million so‘mgacha olishi mumkin. Iste’mol krediti esa 400 million so‘mgacha ajratiladi.
Yangi qonun loyihasi mamlakat aholisiga xorijda ishlab chiqarilgan mahsulotlar uchun kamroq foizda va ko‘proq miqdorda kredit olish imkonini beradi.
Ayrim bank sohasi xodimlari fikriga ko‘ra, qonun loyihasi odamlar orasida bankka bo‘lgan ishonchni yanada oshirishi mumkin.
Bundan tashqari 15-moddada nazarda tutilgan “iste’molchi moliyaviy iste’mol krediti olish to‘g‘risida iste’mol tovarlarini (xizmatlarni) ishlab chiqaruvchi yoki realizatsiya qiluvchini oldindan yozma yoki elektron shaklda xabardor qilishi shart” degan qism chiqarib tashlandi.
Buning natijasida iste’molchi tomonidan ishlab chiqaruvchi yoki realizatsiya qiluvchini oldindan xabardor qilishi shartligi o‘z ahamiyatini yo‘qotadi.
Izoh (0)