Toshkent viloyati Chinoz tumanida qonunga xilof ravishda baliq ovlagan fuqaroga chora ko‘rildi. Bu haqda Davlat ekologiya qo‘mitasi xabar qildi.
Qayd etilishicha, fuqaro B.E. Chinoz tumanidan oqib o‘tuvchi Sirdaryo daryosiga baliq ovlash uchun borgan. Biroq baliq ovlash uchun fuqaroda hech qanday ruxsatnoma yo‘q bo‘lgan.
Toshkent viloyati Ekologiya boshqarmasi davlat inspektorlari hamda Toshkent viloyati Ichki ishlar bosh boshqarmasi post-patrul xizmati xodimlari hamkorlikda o‘tkazilgan tadbirda mazkur noqonuniy holatga chek qo‘yilgan. Fuqaroga nisbatan Ma’muriy javobgarlik to‘g‘risidagi kodeksning 90-moddasi (ov qilish va baliq ovlash qoidalarini, shuningdek hayvonot dunyosidan foydalanishning boshqa turlarini amalga oshirish qoidalarini buzish) 1-qismi bilan ma’muriy bayonnoma rasmiylashtirilgan.
Shuningdek, ushbu reyd tadbirida noma’lum shaxslarga tegishli baliq ovlashga mo‘ljallangan 200 metr leskali to‘rlar yig‘ib olingan.
Izoh (0)