Бош прокуратура “Ўзбекистон Республикаси табиий сув ҳавзаларида балиқ овлаш қоидаларини тасдиқлаш тўғрисида”ги Вазирлар Маҳкамаси қарори лойиҳасини муҳокамага қўйди.
Лойиҳа матнида қайд этилишича, балиқ овлаш билан боғлиқ қонунчилик ҳужжатларидаги мавжуд бўшлиқлар табиий сув ҳавзаларидаги балиқ ресурсларини муҳофаза қилиниши устидан самарали назорат ўрнатиш имкониятлари чекланмоқда. Оқибатда сўнгги йилларда балиқ овлаш билан боғлиқ ҳуқуқбузарликлар сони ортган. Тақиқланган балиқ овлаш қуроли ва ашёларини йўқ қилиш борасида нормаларнинг мавжуд эмаслиги оқибатида такрорий ҳуқуқбузарликлар содир этиш ҳолатлари кўпаймоқда.
Шунингдек, мамлакатда табиий сув ҳавзаларидан саноат миқёсида балиқ овлаш учун тўлов миқдори, ноқонуний балиқ овлаш оқибатида етказилган зарарларни ҳисоблаш тартиблари ҳам мавжуд эмас.
“Мамлакатимиз табиий сув ҳавзаларидан балиқ овлаш соҳасидаги муносабатларни тартибга солиш, улардаги балиқ ресурсларини муҳофаза қилиш ва браконьерлик ҳолатларининг олдини олиш учун соҳани ҳуқуқий жиҳатдан тартибга солиш заруриятини вужудга келтирмоқда”, — дейилади ҳужжат матнида.
Шу муносабат билан Ўзбекистон табиий сув ҳавзаларида балиқ овлаш қоидалари иловага мувофиқ тасдиқланиб, ушбу қарор 2023 йил 1 июлдан бошлаб амалга киритилиши кутилмоқда.
Балиқларни тутиш учун тўловлар миқдорига кўра, ноёб ва йўқ бўлиб кетиш хавфи остидаги турлар, Ўзбекистон “Қизил китоби”га киритилган балиқларни илмий, тиббий мақсадларда овлаш учун БҲМга 3 баробари миқдорида тўловни амалга ошириш лозим бўлади. Хорижий фуқаролар ва юридик шахслар учун эса мазкур тўлов (1 донаси учун) 500 долларни ташкил этади.
Қарор лойиҳаси билан
- табиий сув ҳавзаларида ҳаваскорлик, спорт ва саноат мақсадида балиқ овлаш тартиби;
- балиқларнинг саноатбоб ўлчамлари, уларни овлаш учун тўловлар миқдори, овлаш учун рухсат берилган тўрларни махсус тамғалаш бўйича талаблар ҳамда саноат мақсадида балиқ овлашнинг ҳисобини юритиш тартиби;
- балиқ ресурсларидан фойдаланиш устидан назорат, ноқонуний балиқ овлаш оқибатида етказилган зарарларни ҳисоблаш тартиби;
- тақиқланган балиқ овлаш қурол ва воситаларини йўқ қилиш масалаларини ҳал этишнинг тартиби белгиланмоқда.
Аввалроқ Сирдарё вилояти Сардоба туманида ўтказилган рейд тадбирида, “Сардоба” сув омборида ноқонуний равишда балиқ овлаган икки фуқаро аниқлангани, Жиззахда икки фуқаро ноқонуний балиқ овлаб, табиатга салкам 106 миллион сўм зарар етказгани тўғрисида хабар берилганди.
Изоҳ (0)