Nozim Husanov kambag‘allikni qisqartirish va bandlik vazirining birinchi o‘rinbosari lavozimidan ozod etildi, deb xabar beradi O‘zA.

Nozim Husanov vazirning birinchi o‘rinbosari lavozimiga 2022-yilning dekabrida tayinlangan edi. Bungacha 2019-yil sentabr oyidan bandlik va mehnat munosabatlari vaziri lavozimida ishlab kelayotgandi.

Nozim Husanov (1976-yil tug‘ilgan) Toshkent avtomobil-yo‘llar instituti (1997), Toshkent moliya instituti (sirtqi bo‘lim, 2002), Prezident huzuridagi Davlat va jamiyat qurilishi akademiyasi (2007) bitiruvchisi hisoblanadi. U 2018-yil may oyidan 2019-yilgacha Toshkentning Sergeli tumaniga hokimlik qilgan.

Prezident farmoniga muvofiq, 2023-yil 1-yanvardan quyidagi respublika davlat boshqaruvi organlarining tashkiliy bo‘ysunuvi o‘zgargandi. Xususan, Oila va xotin-qizlar qo‘mitasi hamda Mahallabay ishlash va tadbirkorlikni rivojlantirish agentligi Kambag‘allikni qisqartirish va bandlik vazirligi huzuriga o‘tkazilgandi. 2022-yil dekabr oxirida Behzod Musayev mazkur vazirlik rahbari etib tayinlangan.

10-aprel kuni huquqni muhofaza qiluvchi organlar tomonidan Kambag‘allikni qisqartirish va bandlik vazirligining Jizzax hamda Sirdaryo viloyatlari bosh boshqarmalari mansabdor shaxslari o‘z vakolatlaridan foydalangan holda pora olayotgan vaqtida qo‘lga olingani ma’lum bo‘lgandi.