Qamoqxonadagi Gruziyaning sobiq prezidenti Mixail Saakashvilining salomatligi keskin yomonlashdi. Siyosiy mahbus Politico nashriga yozgan maqolasida u hozir hayot-mamot yoqasida ekanini aytdi.
“Sakkiz yillik surgundan so‘ng 2021-yil oktabrda erkin va adolatli parlament saylovlarini qo‘llab-quvvatlash uchun Gruziyaga qaytganimda, 54 yoshli sog‘lom va baquvvat odam edim. Keyin meni Gruziya rasmiylari zudlik bilan hibsga oldi va o‘shandan beri mish-mishlar va siyosiy sabablarga ko‘ra vakolatni suiiste’mol qilish ayblovlari asosida qamoqda o‘tiribman.
Buni faqat Kreml va Gruziyaning amaldagi hukumati qonuniy deb biladi. Qamoqda o‘tirganimda esa sog‘lig'im keskin yomonlashdi. Men hozir o‘lyapman”, — dedi sobiq siyosatchi.
Saakashvili qamoqda bo‘lganida unga qanday munosabatda bo‘lishganini ham aytib berdi. Jumladan, kimyoviy qiynoqlar qo‘llanganilganini qo‘shimcha qildi.
“Men muntazam ravishda jismoniy va ruhiy qiynoqlarga duchor bo‘ldim va hozirda tanamda og‘ir metallardan zaharlanish alomatlari bor. 20 dan ortiq og‘ir kasalliklardan aziyat chekyapman, ularning barchasi qamoqda o‘tirganimda paydo bo‘lgan”, — dedi u.
Gruziya sobiq prezidentining fikricha, uning o‘limi Kreml rejimining g‘alabasi bo‘ladi.
“Mening o‘limim Gruziyada siyosiy betartiblikni keltirib chiqarishi mumkin, ammo qiynoqda o‘lishim shubhasiz Putinning g‘alabasi sifatida ko‘riladi – bu mintaqadagi va, ehtimol, dunyoning Rossiya imperializmiga qarshi tura olmaydigan barcha yetakchilar uchun qudratli ramzga aylanadi”, — dedi Saakashvili.
Saakashvilini Gruziyada hibsga olish va qiynoqlar
2021-yil 1-oktabrda Saakashvili sakkiz yil ichida birinchi marta munitsipal saylovlar arafasida Gruziyaga qaytganida hibsga olingan. U bir qancha jinoiy ishlarda, xususan, 2005-yilda gruziyalik sobiq deputat Valeriy Gelashviliga hujum uyushtirganlikda ayblanmoqda. Buning uchun u allaqachon sirtdan olti yillik qamoq jazosiga hukm qilingan.
Hibsga olingandan so‘ng Saakashvili darhol ochlik e’lon qilgan va u 2021-yil 19-noyabrda ochlikni to‘xtatishga rozi bo‘lgan. 29-noyabr kuni Saakashvili hibsga olinganidan keyin birinchi marta sudga olib borilgan va hibsda qiynoqqa solinganini aytgan. U o‘ziga qo‘yilgan ayblovlarni siyosiy ta’qib, o‘zini esa siyosiy mahbus deb biladi.
Uzoq davom etgan ochlik e’lonidan so‘ng siyosatchining ahvoli og‘irlashgan, shu sababli u Rustav qamoqxonasidan Goridagi harbiy gospitalga o‘tkazilgan.
2022-yil dekabrida Ukraina Tashqi ishlar vazirligi o‘sha paytda Tbilisidagi Vivamedi tibbiyot markazida bo‘lgan Saakashvilining sog‘lig‘i sezilarli darajada yomonlashganidan chuqur xavotirda ekanini bildirgan.
2023-yilning 1-fevralida Ukraina prezidenti Vladimir Zelenskiy Gruziya hukumati Saakashvilini “omma oldida qiynoqqa solib, o‘ldirayotganini” aytdi. Saakashvilining o‘zi esa Ukrainadagi urush g‘alabasigacha yashay olmasa, yuragini Kiyevga dafn etishga chaqirdi.
Izoh (0)