Xitoy Tayvan yaqinida uch kunlik harbiy mashg‘ulotlarni boshladi, uning qurolli kuchlari mashg‘ulotlar davomida orolni o‘rab olish bo‘yicha operatsiyani ishlab chiqadi. Bu haqda Reuters xabar berdi.
Ma’lum qilinishicha, mashqlar 10-aprel, dushanba kunga qadar davom etadi. 9-aprel, yakshanba kuni Xitoy qurolli kuchlari Tayvanga zarba berishni simulyatsiya qildi. Xitoy bu mashqlarni Tayvan va “tashqi kuchlar” uchun “qattiq ogohlantirish” deb atamoqda.
Mashg‘ulotga samolyot tashuvchi kema, harbiy kemalar, aviatsiya va turli raketa tizimlari jalb qilingan. Boshqa turdagi qurol va texnikalar, jumladan, elektron urush samolyotlari va bombardimonchi aviatexnika ham ishtirok etishi kutilmoqda.
O‘z navbatida, BBC Xitoyning harbiy mashg‘ulotlari Tayvan prezidenti Tsay Invenning 6-aprel kuni AQSH Senat palatasi spikeri Kevin Makkarti bilan uchrashish uchun AQSHga qilgan safariga javob bo‘lishi mumkinligini taxmin qilmoqda.
9-aprel kuni Tayvan harbiylari harbiy mashg‘ulotlar paytida orolga yaqinlashayotgan Xitoy Xalq ozodlik armiyasining 70 ta samolyoti va 11 ta kemasini payqagan. Reuters 20 ga yaqin harbiy kemalar – Xitoy armiyasining 10 ga yaqini va Tayvanning 10 tasi shartli chegara vazifasini o‘taydigan Tayvan bo‘g‘ozining median chizig‘i yaqinida joylashganini xabar qilmoqda. Ikkala tomon ham provokatsion manyovrlar amalga oshirmayapti.
Tayvan Mudofaa vazirligi ularning qurolli kuchlari mojaroni kuchaytirmasligini va Xitoyning harbiy mashqlariga to‘g‘ri javob berishini ma’lum qildi. Xitoyning “Shandong” aviatashuvchi kemasi hozirda Tayvan janubi-sharqiy qirg‘oqlaridan 400 dengiz milidan ortiq masofada joylashgan bo‘lib, u mashqlarda qatnashmoqda.
Xitoy Harbiy fanlar akademiyasi xodimi Chjao Syaochjuoning so‘zlariga ko‘ra, Xitoy Tayvandagi asosiy nishonlarga zarba berish mashqlari haqida birinchi marta ochiq gapirmoqda.
“Bu nishonlar qatoriga turli infratuzilma obyektlari, masalan, havo yo‘laklari, harbiy logistika obektlari va zarurat tug‘ilganda bir yo‘la yo‘q qilinishi mumkin bo‘lgan boshqa nishonlar kiradi”, — deydi u.
Ayni vaqtda AQSHning oroldagi elchixonasi Qo‘shma Shtatlar mintaqada tinchlik va barqarorlikni saqlash uchun barcha imkoniyatlarga ega ekanini bildirdi.
Izoh (0)