Iroq hukumati Sulaymoniya shahridagi fuqarolik aeroportining o‘qqa tutilishi munosabati bilan Turkiyadan uzr so‘rashni talab qildi. Bu haqda mamlakat prezidenti devoniga tayanib, “RIA Novosti” xabar berdi.
Sulaymoniya fuqaro aviatsiyasi ma’lumotlariga ko‘ra, 7-aprel kuni xalqaro aeroport yaqinida portlash sodir bo‘lgan, natijada yong‘in kelib chiqqan va u o‘chirilgan. Hodisa oqibatida qurbonlar va jarohatlanganlar qayd etilmagan. Al-Hadas telekanali manbasiga ko‘ra, portlashga Turkiya Qurolli kuchlarining droni tomonidan berilgan zarba sabab bo‘lgan.
Portlash vaqtida kurdlarning “Demokratik Suriya kuchlari” qo‘mondoni Mazlum Abdi aeroport hududida bo‘lgan bo‘lishi mumkin. Iroq prezidenti hujum Sulaymoniya aeroporti yaqinida sodir bo‘lganini aytib, buni o‘z suverenitetiga qarshi “dahshatli tajovuz” deb atadi.
“Turkiyaning Iroq Kurdistonidagi harbiy amaliyotlari takrorlanmoqda, oxirgisi Sulaymoniya fuqarolik aeroportini bombardimon qilishdir. Biz Iroq va uning suverenitetiga qilingan bu dahshatli hujumlarni keskin qoralaymiz, Turkiya Iroq zaminida qarama-qarshi kuchlar borligi bahonasida tinch aholini terror qilishda davom etishi uchun hech qanday qonuniy asos yo‘q”, — deyiladi Iroq prezidenti idorasi bayonotida.
Iroq rahbariyati Turkiya hukumatini “mas’uliyatni o‘z zimmasiga olishga, bu harakatlar uchun rasman uzr so‘rashga, hujumlarni to‘xtatishga va tegishli tomonlar bilan muloqot kanallarini ochish orqali ichki muammolarni hal qilishga” chaqirdi.
Shuningdek, hujum takrorlangan taqdirda Iroq ularni oldini olish uchun qat’iy pozitsiyani egallashini bildirdi. Iroq parlamenti birinchi vitse-spikeri Mohsen al-Mandalavi 8-aprel kuni Sulaymoniya aeroportiga hujum bo‘yicha tergov qo‘mitasini tuzishni buyurdi. U buning asosida “suverenitetni saqlab qolish va xalq hayotini har qanday hujumdan himoya qilish uchun” chora ko‘rilishini aytdi.
Turkiya Tashqi ishlar vazirligi mamlakat rasmiylari Sulaymoniyadagi Kurdiston ishchilar partiyasining faolligi kuchaygani sababli Iroqning Sulaymoniya shahridan uchayotgan yoki undan kelayotgan samolyotlar uchun havo hududini yopganini ma’lum qildi.
Turkish Airlines aviakompaniyasi hozirda Sulaymoniyaga reyslar yo‘qligini tasdiqlagan. Shu bilan birga, u Sulaymoniya aeroporti o‘qqa tutilganidan keyin kompaniya veb-sayti Iroqdan xakerlik hujumiga uchragani haqidagi xabarlarini rad etgan.
Izoh (0)