“Paxtakor” stadionining ko‘plab tribunalari ta’mirlash uchun qisman yoki to‘liq yopiladi. Bu haqida PFL matbuot xizmati ma’lum qilmoqda.
Sabab nima?
Tribunalar o‘rindig‘i joylashgan beton qoplamalari oson ko‘chishi va bu maydonga qattiq jismlarning uloqtirilishi ehtimolini oshirgani bois ushbu qaror qabul qilingan.
“Ayni vaqtda “Paxtakor” stadioni tribunalari to‘liq ta’mirga muhtoj hisoblanadi. Mazkur tribunalarni shunchaki kosmetik ta’mirdan chiqarish holatni ijobiy tarafga o‘zgartirmaydi. Har qanday sovuq ob-havo, yog‘ingarchilik yoki muxlislar o‘rtasidagi tartibsizlik beton qoplamaning oson uvalanishiga olib keladi va stadionga qattiq jismlarning uloqtirilishi xavfini oshiradi. Bu esa huquqni muhofaza qiluvchi organlar vakillari, futbolchilar, rasmiylar, to‘p uzatib turuvchi bolalarga jiddiy tan jarohati yetkazilishi ehtimolini oshiradi”, — deyiladi bayonotda.
Tribunadagi kamchiliklar pand bergan vaziyatlar
“Paxtakor” stadioni tribunalari 2022-yili bo‘lib o‘tgan U-23 Osiyo Kubogida ta’mirga muhtoj ekanligi ma’lum bo‘lgandi. Maydonga beton bo‘laklari uloqtirilishi oqibatida O‘zbekiston U-23 terma jamoasining Iroqqa qarshi o‘yinida ko‘ngilsizliklar yuz bergandi. Oqibatda OFK O‘zbekistonning Yaponiya U-23 termasiga qarshi o‘yiniga futbol muxlislari kiritilishini taqiqlagan va O‘FA katta miqdorda jarimaga tortilgandi.
“Mazkur voqeadan keyin “Paxtakor” stadioni tribunalari tosh va beton bo‘laklaridan tozalandi. Sektorlar oraliqlarida kichik ta’mirlash ishlari olib borildi. Ammo holat ijobiy tomonga o‘zgarmaganligini Superliga 3-turidan o‘rin olgan “Paxtakor” — “Navbahor” uchrashuvi ko‘rsatib berdi. Namanganlik futbol muxlislari joy olgan sektorlardan maydonga qarab tosh hamda beton bo‘laklari uloqtirildi”, — deya tushuntirish beradi PFL.
Mazkur holatni inobatga olgan holda PFL Ishchi guruh tuzgan. Undan tashkilot mutaxassislaridan tashqari, O‘FA inspeksiyasi, Toshkent shahar IIBB, shahar Milliy gvardiya boshqarmasi va shahar FVVB vakillari, shuningdek, “Paxtakor” klubi va stadioni rahbariyati joy olgan. Ishchi guruh stadiondagi barcha — 44 ta sektor holatini o‘rganib chiqqan.
Qaysi tribunalar yopiladi?
Ishchi guruh xulosasiga ko‘ra, “Paxtakor” stadioni tribunalari to‘liq ta’mirdan chiqqunga qadar ayrim sektorlar qisman, ayrimlari to‘liq yopiladi.
- Qisman yopiladigan sektorlar: 10, 11, 12, 13, 14, 15, 18, 19, 20, 21, 22, 23 (1—23 qatorgacha);
- To‘liq yopiladigan sektorlar: 1, 2, 3, 4, 5, 6, 7, 8, 9, 16, 17, 24, 25, 26, 27, 28, 29, 30, 37, 38, 39, 40, 41, 42, 43, 44
“Paxtakor” stadioni sektorlari. Qizil rangda qayd etilgan sektorlar ta’mirlash uchun yopiladi
Shuningdek, 31, 32, 33, 34, 35, 36-sektorlar kichik ta’mirlash ishlarini olib borish, har bir rasmiy uchrashuv oldidan to‘liq tozalash hamda nazoratni kuchaytirish sharti bilan muxlislarga xizmat qilishda davom etadi.
“Paxtakor” futbol klubi hamda stadioni rahbariyati xizmat ko‘rsatishi to‘xtatilgan sektorlar hamda o‘rindiqlar uchun chiptalar savdosini cheklashi, taqiqlangan nuqtalarda muxlislar harakatini cheklash uchun sun’iy to‘siqlar o‘rnatish majburiyatini oldi.
Izoh (0)