U-23 Osiyo Kubogi chorak finalidagi toshbo‘ron oqibatida ikki kishi jarohat olgan. O‘zbekistonning yarim finaldagi o‘yini tomoshabinlarsiz o‘tishi mumkin

OFK U-23 Osiyo Kubogi—2022 chorak finali doirasida o‘tkazilgan O‘zbekiston va Iroq terma jamoalari o‘rtasidagi o‘yinda yuz bergan holatlar bo‘yicha keskin qaror chiqarishi mumkin.

Birinchi bo‘lim boshida hakamning qarorlari va raqib futbolchilaridan norozi bo‘lgan ayrim muxlislar maydon va texnik hudud tomon qattiq buyumlarni uloqtirgan. Uchrashuv hakami o‘yinni biroz muddatga to‘xtatdi, biroq keyinchalik bahs davom ettirildi.

“Championat.asia”ning xabar qilishicha, uloqtirilgan jismlar tufayli bir nafar o‘zbekistonlik fotosuratchi va bir nafar xorijlik operator jarohat olgan.

Shuningdek, nashr o‘z manbalariga tayanib yozishicha, O‘zbekiston U-23 terma jamoasi ishtirokidagi yarim final o‘yini tomoshabinlarsiz o‘tkazilishi mumkin. OFK mazkur masala yuzasidan hali qaror qabul qilgani yo‘q.

Temur Kapadze shogirdlari yarim finalni 15-iyun kuni o‘tkazadi. Unda Janubiy Koreya yoki Yaponiya raqib bo‘ladi.