“Пахтакор” стадионининг кўплаб трибуналари таъмирлаш учун қисман ёки тўлиқ ёпилади. Бу ҳақида ПФЛ матбуот хизмати маълум қилмоқда.
Сабаб нима?
Трибуналар ўриндиғи жойлашган бетон қопламалари осон кўчиши ва бу майдонга қаттиқ жисмларнинг улоқтирилиши эҳтимолини оширгани боис ушбу қарор қабул қилинган.
“Айни вақтда “Пахтакор” стадиони трибуналари тўлиқ таъмирга муҳтож ҳисобланади. Мазкур трибуналарни шунчаки косметик таъмирдан чиқариш ҳолатни ижобий тарафга ўзгартирмайди. Ҳар қандай совуқ об-ҳаво, ёғингарчилик ёки мухлислар ўртасидаги тартибсизлик бетон қопламанинг осон уваланишига олиб келади ва стадионга қаттиқ жисмларнинг улоқтирилиши хавфини оширади. Бу эса ҳуқуқни муҳофаза қилувчи органлар вакиллари, футболчилар, расмийлар, тўп узатиб турувчи болаларга жиддий тан жароҳати етказилиши эҳтимолини оширади”, — дейилади баёнотда.
Трибунадаги камчиликлар панд берган вазиятлар
“Пахтакор” стадиони трибуналари 2022 йили бўлиб ўтган U-23 Осиё Кубогида таъмирга муҳтож эканлиги маълум бўлганди. Майдонга бетон бўлаклари улоқтирилиши оқибатида Ўзбекистон U-23 терма жамоасининг Ироққа қарши ўйинида кўнгилсизликлар юз берганди. Оқибатда ОФК Ўзбекистоннинг Япония U-23 термасига қарши ўйинига футбол мухлислари киритилишини тақиқлаган ва ЎФА катта миқдорда жаримага тортилганди.
“Мазкур воқеадан кейин “Пахтакор” стадиони трибуналари тош ва бетон бўлакларидан тозаланди. Секторлар оралиқларида кичик таъмирлаш ишлари олиб борилди. Аммо ҳолат ижобий томонга ўзгармаганлигини Суперлига 3-туридан ўрин олган “Пахтакор” — “Навбаҳор” учрашуви кўрсатиб берди. Наманганлик футбол мухлислари жой олган секторлардан майдонга қараб тош ҳамда бетон бўлаклари улоқтирилди”, — дея тушунтириш беради ПФЛ.
Мазкур ҳолатни инобатга олган ҳолда ПФЛ Ишчи гуруҳ тузган. Ундан ташкилот мутахассисларидан ташқари, ЎФА инспекцияси, Тошкент шаҳар ИИББ, шаҳар Миллий гвардия бошқармаси ва шаҳар ФВВБ вакиллари, шунингдек, “Пахтакор” клуби ва стадиони раҳбарияти жой олган. Ишчи гуруҳ стадиондаги барча — 44 та сектор ҳолатини ўрганиб чиққан.
Қайси трибуналар ёпилади?
Ишчи гуруҳ хулосасига кўра, “Пахтакор” стадиони трибуналари тўлиқ таъмирдан чиққунга қадар айрим секторлар қисман, айримлари тўлиқ ёпилади.
- Қисман ёпиладиган секторлар: 10, 11, 12, 13, 14, 15, 18, 19, 20, 21, 22, 23 (1—23 қаторгача);
- Тўлиқ ёпиладиган секторлар: 1, 2, 3, 4, 5, 6, 7, 8, 9, 16, 17, 24, 25, 26, 27, 28, 29, 30, 37, 38, 39, 40, 41, 42, 43, 44
“Пахтакор” стадиони секторлари. Қизил рангда қайд этилган секторлар таъмирлаш учун ёпилади
Шунингдек, 31, 32, 33, 34, 35, 36-секторлар кичик таъмирлаш ишларини олиб бориш, ҳар бир расмий учрашув олдидан тўлиқ тозалаш ҳамда назоратни кучайтириш шарти билан мухлисларга хизмат қилишда давом этади.
“Пахтакор” футбол клуби ҳамда стадиони раҳбарияти хизмат кўрсатиши тўхтатилган секторлар ҳамда ўриндиқлар учун чипталар савдосини чеклаши, тақиқланган нуқталарда мухлислар ҳаракатини чеклаш учун сунъий тўсиқлар ўрнатиш мажбуриятини олди.
Изоҳ (0)