Qozog‘iston hukumati piyoz eksportiga qo‘yilgan taqiqni bekor qildi, biroq eksport hajmiga vaqtinchalik cheklovlar kiritdi. Mamlakat Qishloq xo‘jaligi vazirligi bu haqda xabar berdi.
Ma’lum qilinishicha, 8-apreldan 28-aprelgacha respublika hududidan uchinchi davlatlar va Yevrosiyo iqtisodiy ittifoqi (YOII) davlatlariga 20 ming tonna piyoz eksporti uchun kvotalar joriy etilgan.
“Bitta talabgor uchun tovar eksportiga ruxsat etilgan cheklov jami 500 tonnadan oshmaydi”, — deyiladi xabarda.
Mazkur cheklov kvotaning butun muddati uchun o‘rnatiladi. 2023-yil yanvar oyida Qozog‘iston Qishloq xo‘jaligi vazirligi piyoz eksportini 3 oy muddatga to‘xtatgandi. Bu piyozning ommaviy eksport qilinishning oldini olish va narxlarni barqarorlashtirish uchun amalga oshirilgan.
Ekin yetishmasligi Markaziy Osiyoning bir qancha mamlakatlarida, jumladanб Tojikistonda qishloq xo‘jaligi mahsulotlari yetishmasligiga ham olib kelgan. Oqibatda mamlakat piyoz, kartoshka va sabzi eksportiga cheklov kiritgan. Tanqislikning asosiy sabablari anomal sovuq va yoqilg‘i narxining oshishi bo‘lgan.
Ma’lumot o‘rnida, O‘zbekistonda 15-martdan piyoz eksportiga qo‘yilgan vaqtinchalik cheklov bekor qilingan. Piyoz narxining keskin o‘sishi, aholining ichki iste’mol talabini qondirish hamda oziq-ovqat xavfsizligini ta’minlash maqsadida hukumat topshirig‘i bilan 1-yanvardan piyoz eksportiga vaqtincha cheklov o‘rnatilgandi. Ushbu cheklov 4 oy amal qilishi belgilangandi. Qirg‘iziston Markaziy Osiyoda piyoz eksportiga qo‘yilgan taqiqni muddatidan oldin (3-martdan) bekor qilgan birinchi davlat bo‘lgan.
Izoh (0)