Qozog‘istonda 10-apreldan fuqarolardan noqonuniy saqlanayotgan o‘qotar qurollar, o‘q-dorilar va portlovchi moddalarni sotib olish boshlanadi. Bu haqda Yesil tumani IIBda bo‘lib o‘tgan brifingga tayanib, “Daryo”ning Qozog‘istondagi muxbiri xabar berdi.
Poytaxt IIB ma’muriy politsiya boshqarmasining maxsus topshiriqlar bo‘yicha katta inspektori Azamat Amen bu haqda ma’lumot bergan. U hukumat qurollarni ixtiyoriy topshirganlik uchun o‘z g‘aznasidan 34500 tengedan (77 dollar) 345 ming tengegacha (771 dollar) to‘lashga tayyorligini bildirdi. Qurolni topshirgan shaxsning karta hisobiga pul tushiriladi.
Mukofot puli miqdori nimaga bog‘liq bo‘ladi?
Otishga va sotishga yaroqli qurollar uchun maksimal miqdorda pul beriladi. Foydalanishga yaroqli, lekin sotilmagan o‘qotar qurollar dastlabki qiymatining 70 foiz miqdorida baholanadi.
“Sud-tibbiyot ekspertlarining xulosasiga ko‘ra, qurol, o‘q-dorilar va portlovchi moddalar sifatida tan olinmagan buyumlarga pul to‘lanmaydi. Ushbu ro‘yxatga Ichki ishlar vazirligida ro‘yxatdan o‘tgan yoki ‘jinoyat’ toifasida ro‘yxatga olingan, ya’ni ilgari yo‘qolgan yoki o‘g‘irlangan qurollar ham kiradi. Gazli va travmatik qurollar uchun qo‘lda yasalgan o‘q-dorilar ham sotib olinmaydi”, — dedi Azamat Amen.
Ostonaliklar Qozog‘iston poytaxtining barcha politsiya bo‘limlarida qurol-yarog‘ni pulga almashtirishi mumkin bo‘ladi. Portlovchi o‘q-dorilarni topib olganlardan ularni o‘zlari bilan olib ketmaslik, zudlik bilan eng yaqin politsiya bo‘limiga qo‘ng‘iroq qilish so‘ralgan.
Qurolni topshirgan shaxslar jinoiy va ma’muriy javobgarlikdan ixtiyoriy ravishda ozod qilinadi. O‘qotar qurol va boshqa o‘q-dorilarni sotib olish uchun har bir hududning o‘z miqdori mavjud. Ostona uchun bu yil 2 million tengedan (4470 dollar) oshadi. Ushbu mablag‘larga 25 dan 35 tagacha qurol sotib olinishi kutilmoqda.
Svetlana Shesternyova, Olmaota
Izoh (0)