Kira Naytli, Ben Afflek, Riz Uizerspun: Kinodagi karyerasini bolaligidan boshlagan mashhurlar (foto)

Gollivud yulduzlari orasida kinodagi karyerasini bolaligidan boshlagan bo‘lsa-da, mashhurlikka ancha keyinroq erishganlari ham bor. The Voice nashri shu kabi mashhur aktyorlar haqida ma’lumot berdi.

Kira Naytli

Kira Naytli “Bekhem kabi o‘yna” filmidam rol o‘ynaganida atigi 17 yoshda va “Karib dengizi qaroqchilari: Qora marvarid tavqi la’nati” loyihasida suratga tushganida 18 yoshda edi. Aktrisa bu loyihalarda ishtirok etganidan so‘ng tomoshabinlarning e’tiboriga tushdi, uning bu kinokartinalarda suratga tushmasidan deyarli o‘n yil oldin kinodagi faoliyatini boshlagani haqida juda kam inson biladi. U ilk marta 1993-yilda ekranda paydo bo‘lgan va 10 yoshida u “Bill” teleserialida voyaga yetmagan o‘g‘ri Shina Rouz rolini o‘ynagan. Shuningdek, Kiraning otasi ham xuddi shu serialda suratga tushgan.

Elizabet Teylor

Elizabet Teylor “Issiq tom ustidagi mushuk” yoki “Kleopatra” kabi filmlardagi “katta inson” rollarini shu qadar muvaffaqiyatli ijro etganki, uning bolaligida ham bir nechta loyihalarda suratga tushganini unutish oson. Bo‘lajak kino yulduzi o‘zining debyutini 10 yoshida, ya’ni 1942-yilda “Har daqiqada inson tug‘iladi” filmida qilgan.

Ben Afflek

Ko‘pchilik “Aqlli Uill Xanting” filmini Ben Afflekning kinodagi debyuti deb o‘ylaydi, biroq u aslida bolaligida aktyorlik faoliyatini boshlagan. Masalan, aktyor 12 yoshida PBS programmasining “Mimining sayohati” ta’lim dasturida suratga tushgan.

Riz Uizerspun

Rizning kino olamdagi birinchi katta roli 1991-yilda “Oydagi inson” filmi bo‘ldi, o‘sha paytda aktrisa 14 yoshda edi. Biroq aktrisa 1998—1999-yillarga kelib, “Plezantvil” va “Shafqatsiz o‘yinlar” filmlaridagi rollari tufayli haqiqatan ham mashhurlikka erishayotgan yulduz nomiga da’vogarlik qila boshladi. Shundan keyin u Gollivudda nafaqat aktrisa, balki prodyuser sifatida ham katta muvaffaqiyatlarga erishdi.

Rayan Reynolds

Rayan voyaga yetganidan keyin Gollivudga kirib keldi, biroq u o‘zining vatani Kanadada juda erta aktyorlik faoliyatini boshlagan. U o‘z karyerasini 1990-yilda o‘smir yoshdagi bolalar uchun suratga olingan “O‘n besh” dramasida boshlagan, o‘sha paytda aktyor 15 yoshda bo‘lgan.