Navoiy viloyatida giyohvand moddalar savdosi bilan shug‘ullangani uchun jinoiy javobgarlikka tortilayotgan shaxsga ishni pul evaziga yengillashtirib berishni va’da qilgan ayol qo‘lga olindi. Bu haqda viloyat IIB axborot xizmati xabar berdi.
Qayd etilishicha, 51 yoshli asli samarqandlik M.A. 2023-yilning fevral oyida giyohvand modda savdosi bilan shug‘ullangani aniqlangan va unga nisbatan tergovga qadar surishtiruv ishlari olib borilgan. Bundan xabar topgan tanishi R.A. tergovchi bilan gaplashib ko‘rgani, 100 million so‘m evaziga uni javobgarlikdan ozod qilib berishini va oldindan 10 million, keyin qolganini olib kelishini aytgan.
M.A tanishi R.A.ga aytilgan pulni olib kelgan, bir necha kundan keyin esa o‘ziga nisbatan Jinoyat kodeksining 273-moddasi 12-qismi bilan jinoyat ishi qo‘zg‘atilganidan xabar topgan. R.A. bo‘lsa uni turli asossiz gaplar bilan aldab, yana 10 million olib kelsa, jazosini yengillashtirib berishini, aks holda uzoq muddatga qamalib ketishini aytib qo‘rqitgan. Shundan so‘ng ayol M.A.dan yana 10 million pullarini olayotgan vaqtida Shaxsiy xavfsizlik bosh boshqarmasi xodimlari tomonidan qo‘lga olingan.
Ayni paytda R.A.ning qilmishiga qonuniy baho berildi, unga nisbatan Jinoyat kodeksining 168-moddasi (firibgarlik) 1-qismi hamda 211-moddasi (pora berish) 1-qismi bilan jinoyat ishi qo‘zg‘atilgan.
“Tergovga qadar surishtiruvlar natijasida M.A.ning giyohvand moddalar savdosi bilan shug‘ullangani yuzasidan surishtiruv ishlari olib borayotgan hech bir IIB xodimining mazkur ishga aloqasi yo‘qligi aniqlandi”, — deyiladi xabarda.
Eslatib o‘tamiz, shu yilning fevral oyida Ohangaron prokuratura binosi qorovuli shahar prokuraturasi tergovchisining ish yurituvida bo‘lgan jinoyat ishi doirasida tergovga jalb qilingan fuqaro E.dan jinoyat ishini yengillashtirib, ijobiy hal qilib berish evaziga 9 ming dollar olgan vaqtida ushlangandi. 2022-yilning oktabrida esa Farg‘ona va Toshkent viloyatlarida jinoyat ishlarini ijobiy hal qilib berishni va’da qilgan shaxslar qo‘lga olingan edi.
Izoh (0)