Самарқанд вилояти Булунғур туманида ўзганинг Spark автомобилини миниб қочган шахс қўлга олинди. Бу ҳақда вилоят ИИБ ахборот хизмати хабар берди.
Маълум қилинишича, 5 апрель куни соат 08:35 да Булунғур тумани ИИБга транспорт воситаси олиб қочилгани тўғрисида ариза келиб тушган. Аниқланишича, ҳайдовчи ўзининг Spark автомобили ичида калитни қолдирган ҳолда уйига кириб кетган ва эртаси куни машинаси жойида йўқлигидан хабар топган.
Ҳолат юзасидан Самарқанд вилояти ЖХХ ЙҲХБ ходимлари томонидан олиб борилган суриштирув ишлари натижасида миниб қочилган Spark топилган. Машинани олиб қочган гумонланувчи Жиноят-процессуал кодексининг 221-моддаси тартибида ушланиб, унга нисбатан қамоққа олиш эҳтиёт чораси қўлланган.
“Спиртли ичимлик ичиб, ортидан нос чекканим сабабли йўлда турган ўзганинг машинасига ўтириб, уни ўзим билмаган ҳолда бошқарганман. Рулда ухлаб қолганман. Кейин бир яхши инсон келиб, мени уйғотиб, уйимга олиб бориб ташлаган. Қилган ишимдан пушаймонман”, — дейди гумонланувчи.
Бундан аввал Бухорода маст фуқаро танишининг Spark автомобилини олиб қочгани, Андижонда олиб қочилган Spark иккита автомобилга бориб урилгани ҳамда Фарғонада собиқ куёв қайнонасининг машинасини олиб қочгани ҳақида хабар берилганди.
Изоҳ (0)