Toshkent shahri Sergeli tumanida 3-aprel kuni ayol o‘zi va uch nafar farzandini 9-qavatdan tashlab, joniga qasd qilgandi. “Daryo” mazkur mavzu yuzasidan uyushtirgan suhbatda psixolog Feruza Olimova jamiyatda bu kabi holatlar ko‘payganini, oila institutiga darz ketayotganini bildirdi.
Jamiyat “SOS” belgisini yoqishi kerak
Feruza Olimovaning ma’lum qilishicha, so‘nggi paytlarda ota-ona va farzand o‘rtasidagi tushunmovchiliklar, o‘smirlar suitsidi mavzusidagi murojaatlar ko‘paygan.
“Ota-onalarda ota-onalik ko‘nikmalarining deyarli shakllanmagani, o‘z muammolarini bolalariga sochishi, bolaning tarbiyasi haqida umuman o‘ylamasligi, ilmga, qadriyatlarga mos ko‘nikmalarning yo‘qligi ko‘p kuzatilyapti. Ko‘pincha bolalar psixologik jihatdan qarovsiz holatda qolib ketyapti. Ota-ona va farzand o‘rtasida tushunmovchiliklar bor, farzandlarning uydan ketib qolishi, o‘smirlarning o‘z joniga qasd qilish holatlarida murojaat qilishmoqda. Ming afsuski, hozirgi paytda bu kabi holatlar ko‘paygan. Shunaqa vaqtda jamiyatda “SOS” belgisini ishga tushirish kerak. Oila instituti tanazzulining belgilari mavjud”, — deydi psixolog.
“Onasi 9-qavatdan tashlab yuborgan bolalar nimani his qilgan ekan?”
Feruza Olimova bolalarini ko‘p qavatli uy yuqori qavatidan tashlab yuborgan ona holatiga to‘xtalib, uning oilaviy munosabatlari ham joyida bo‘lmagani, travma va psixik jarohatlar kuzatilgan bo‘lishi mumkinligini taxmin qildi.
“Agar onaning intellekti qanchalik yuqori bo‘lsa, u shunaqa, o‘ziga o‘xshagan bolalarni tarbiya qiladi. Tasavvur qilyapman, o‘zi farzandlarini 9-qavatdan tashlab yuborgan ona shu ishni qilishidan oldin bolalariga qanaqa munosabatda bo‘lgan ekan? Ularni urgandir, xoynahoy, ayblagandir, alamini bolalaridan olgandir, ularga baqirgandir. Chunki mana shunaqa holatda bo‘lgan u. Va o‘sha paytda kichkinagina bolalar nimani his qilgan ekan? Ularning bitta-yu bitta suyangan, yagona ishongan odami onasi bo‘lgan. Onasi unga ziyon yetkazishi mumkinligi ularning xayoliga ham kelmagan. Hayotdagi bitta-yu bitta manbasi ona edi. Bu juda og‘ir”, — deya fikr bildirdi u.
Izoh (0)