Тошкент шаҳри Сергели туманида 3 апрель куни аёл ўзи ва уч нафар фарзандини 9-қаватдан ташлаб, жонига қасд қилганди. “Дарё” мазкур мавзу юзасидан уюштирган суҳбатда психолог Феруза Олимова жамиятда бу каби ҳолатлар кўпайганини, оила институтига дарз кетаётганини билдирди.
Жамият “SOS” белгисини ёқиши керак
Феруза Олимованинг маълум қилишича, сўнгги пайтларда ота-она ва фарзанд ўртасидаги тушунмовчиликлар, ўсмирлар суициди мавзусидаги мурожаатлар кўпайган.
“Ота-оналарда ота-оналик кўникмаларининг деярли шаклланмагани, ўз муаммоларини болаларига сочиши, боланинг тарбияси ҳақида умуман ўйламаслиги, илмга, қадриятларга мос кўникмаларнинг йўқлиги кўп кузатиляпти. Кўпинча болалар психологик жиҳатдан қаровсиз ҳолатда қолиб кетяпти. Ота-она ва фарзанд ўртасида тушунмовчиликлар бор, фарзандларнинг уйдан кетиб қолиши, ўсмирларнинг ўз жонига қасд қилиш ҳолатларида мурожаат қилишмоқда. Минг афсуски, ҳозирги пайтда бу каби ҳолатлар кўпайган. Шунақа вақтда жамиятда “SOS” белгисини ишга тушириш керак. Оила институти таназзулининг белгилари мавжуд”, — дейди психолог.
“Онаси 9-қаватдан ташлаб юборган болалар нимани ҳис қилган экан?”
Феруза Олимова болаларини кўп қаватли уй юқори қаватидан ташлаб юборган она ҳолатига тўхталиб, унинг оилавий муносабатлари ҳам жойида бўлмагани, травма ва психик жароҳатлар кузатилган бўлиши мумкинлигини тахмин қилди.
“Агар онанинг интеллекти қанчалик юқори бўлса, у шунақа, ўзига ўхшаган болаларни тарбия қилади. Тасаввур қиляпман, ўзи фарзандларини 9-қаватдан ташлаб юборган она шу ишни қилишидан олдин болаларига қанақа муносабатда бўлган экан? Уларни ургандир, хойнаҳой, айблагандир, аламини болаларидан олгандир, уларга бақиргандир. Чунки мана шунақа ҳолатда бўлган у. Ва ўша пайтда кичкинагина болалар нимани ҳис қилган экан? Уларнинг битта-ю битта суянган, ягона ишонган одами онаси бўлган. Онаси унга зиён етказиши мумкинлиги уларнинг хаёлига ҳам келмаган. Ҳаётдаги битта-ю битта манбаси она эди. Бу жуда оғир”, — дея фикр билдирди у.
Изоҳ (0)