Ukraina Rossiya ustidan urushda g‘alaba qozonsa, NATOga a’zo bo‘ladi. Alyans bosh kotibi Yens Stoltenberg bu haqda ma’lumot berdi.
“Ukraina bo‘yicha NATOning pozitsiyasi o‘zgarmadi: Ukraina alyansga a’zo bo‘ladi. Ammo Kiyevning asosiy vazifasi urushda g‘alabani ta’minlashi kerak”, — dedi Stoltenberg.
Siyosatchi NATO davlatlari Ukraina suvereniteti va hududiy yaxlitligini himoya qilishda yordam berishi kerakligini aytdi. Stoltenberg alyansga faqat suveren va mustaqil davlat kirishi mumkinligini ta’kidladi. U shu sababdan mamlakatni NATOga qabul qilishning yagona yo‘li Rossiya ustidan g‘alaba qozonish ekanini bildirdi.
Alyans bosh kotibi hozirda Ukrainani Rossiya harbiylarini “quvib chiqarish” uchun zarur bo‘lgan barcha turdagi qurol-yarog‘lar bilan ta’minlash muhimligini qayd etdi. Bundan tashqari, Stoltenberg NATO davlatlari allaqachon sovet davridagi qurollar, doktrinalar va standartlardan alyans standartlariga o‘tish uchun Ukraina bilan hamkorlik qilayotganini aytdi.
Eslatib o‘tamiz, 14-fevral kuni Ukraina mudofaa vaziri Aleksey Reznikov NATO bosh kotibi Yens Stoltenberg bilan uchrashuvdan so‘ng 2022-yili Ukraina haqiqatda Shimoliy Atlantika alyansiga a’zo bo‘lgani va Mudofaa vazirligi buni qonuniy tasdiqlash uchun hamma narsani qilayotganini aytgandi.
Bundan tashqari, 13-fevral kuni NATO bosh kotibi o‘rinbosari Mircha Joane Berlinda bo‘lib o‘tgan Myunxen xavfsizlik konferensiyasida Rossiya NATO davlatlari bilan to‘g‘ridan-to‘g‘ri qarama-qarshilikka kirishni istamasligini aytgandi.
Izoh (0)