7-aprelga o‘tar kechasi Isroil armiyasi G‘azo sektoriga zarba berdi. OAV xabar berishicha, Isroil G‘azo sektoridagi HAMAS harakatining pozitsiyalariga hujum qilgan. Kamida 10 ta portlash sodir bo‘lgan. Qurbonlar haqida hozircha ma’lumot yo‘q. G‘azodan Isroilga uchirilgan javob raketalari esa “Temir gumbaz” havo hujumidan mudofaa tizimi yordamida qaytarilgan.
Isroil armiyasi matbuot xizmati ham hujumni tasdiqladi. Ularning aytishicha, bu “Hizbulloh” tashkilotining 6-aprel kuni Livan hududidan turib Isroilga yo‘llagan avizarbalariga javob bo‘lgan. O‘sha kuni Isroil bosh vaziri Binyamin Netanyaxu xavfsizlik bo‘yicha tezkor yig‘ilish o‘tkazgandi.
Isroil armiyasi G‘azodan keyin Livan hududiga raketa hujumini uyushtirganini xabar qildi. Harbiylarning bayonotiga ko‘ra, ular Livan janubida joylashgan “HAMAS infratuzilma obyektlarini nishonga olgan”. Al Hadath telekanali gap Tir shahri hududi haqida ketayotganini yozdi. Uning manbalariga ko‘ra, Isroil harbiy-havo kuchlari oltita raketa zarbasini yo‘llagan.
Eslatib o‘tamiz, 6-aprel kuni Livan hududidan Isroilga 30 ga yaqin raketa uchirilgani ma’lum qilindi. Bu Isroil hukumati tomonidan e’lon qilingan ma’lumot hisoblanadi. Livandagi “Hizbulloh” guruhi aviahujum sodir bo‘lishidan oldin falastinliklarga hujum qilgan Isroilga qarshi “barcha choralar” bilan javob qaytarishini bildirgan.
5 va 6-aprel kunlari Isroil kuchlari Al-Aqso masjididagi falastinliklarga hujum qilgan. Politsiya falastinliklarni tarqatishda elektr toki granatalari va rezina o‘qlardan foydalangan. Isroil huquq-tartibot idoralari o‘nlab “voyaga yetmagan jinoyatchilar” politsiyaga tosh otayotgani, xavfsizlik kuchlari esa tartibni tiklash uchun harakat qilishga majbur bo‘layotganini iddao qilgan.
Falastin Qizil Yarim Oy jamiyatiga ko‘ra, Isroil xavfsizlik kuchlari shifokorlarning voqea joyiga kelishiga va yaradorlarga yordam ko‘rsatishiga ruxsat bermagan. Isroilning xatti-harakatlari, xususan, Iordaniya va Misr tomonidan qoralangan.
Izoh (0)