АҚШ, Германия ва Венгрия НАТОнинг ёзги саммитида Украинага алянсга қўшилиш бўйича “йўл харитаси”ни таклиф қилишга қарши чиқди, деб ёзмоқда Financial Times ўз манбаларига таяниб.
Нашрнинг ёзишича, алянсдаги келишмовчиликлар апрель ойи бошида НАТО ташқи ишлар вазирларининг Брюсселдаги йиғилишида юзага келган. Ушбу тадбирда алянс аъзолари саммит якунида Украинага нима таклиф қилиш кераклиги ҳақида келишиб олишга уринган.
Алянснинг барча аъзолари Россиянинг кенг кўламли босқинчилиги давом этаётган бир пайтда Украинанинг НАТОга киришини жиддий муҳокама қилишнинг иложи йўқ, деган умумий фикрда. Шунга қарамай, нашрнинг учрашувларда қатнашган икки манбаси айтишича, НАТОда навбатдаги саммитда Украинага алянсга аъзо бўлиш учун “сиёсий йўл” таклиф қилиш тарафдорлари кўпайиб бормоқда.
Ҳозирда мавжуд НАТО—Украина комиссиясини НАТО—Украина кенгашига айлантириш имконияти ҳам муҳокама қилинмоқда, бу Украинанинг алянс ҳамкори мақомини оширади, дея қайд этди газета.
Бу таклифларга жумладан АҚШ қарши чиққан. BBC рус хизматига кўра, бу Вашингтоннинг уруш даврида Киев ва алянс алоқаларининг чуқурлашиши Россия билан можаронинг кучайишига олиб келиши ҳақидаги хавотирлари билан боғлиқ.
АҚШ иттифоқдошларига Украина урушда ғалаба қозониш учун ҳозирча Киевга қисқа муддатли ҳарбий, молиявий ва гуманитар ёрдам кўрсатишга эътибор қаратишни таклиф қилмоқда, дейди FT манбалари. АҚШ расмийларининг айтишича, Вилнюсдаги саммитда Украинага амалий ёрдам, масалан, ўқ-дорилар масаласи муҳокама қилишини керак, урушдан кейинги эҳтимолий сиёсий алоқалар ҳақидаги мунозаралар эса бу мақсадга путур етказади.
Украина 2022 йил сентябрда, Россия Украина ҳудудларини аннексия қилганидан сўнг, НАТОга аъзо бўлиш учун расмий ариза топширган эди. 2023 йил март ойида Киев НАТОнинг июль ойида Вильнюсда бўлиб ўтадиган саммитига расмий таклиф олди. Ушбу воқеани шарҳлар экан, Украина президенти Владимир Зеленский саммитдан мамлакат учун узоқ муддатли хавфсизлик кафолатларини кутаётганини айтди.
Изоҳ (0)