Finlyandiya 4-aprel kuni rasman NATOning 31-a’zosi bo‘ldi, shu tariqa Rossiyaning alyans bilan quruqlikdagi chegarasi ikki barobarga oshdi. Rossiya prezidenti matbuot kotibi Dmitriy Peskov NATOning kengayishiga munosabat bildirdi. Bu haqda “TASS” xabar berdi.
Peskovning so‘zlariga ko‘ra, Rossiya har safar NATO chegaralariga yaqinlashganda mamlakatda butun xavfsizlik arxitekturasini muvozanatlash uchun choralar ko‘radi.
“Axir NATO Rossiya chegaralari tomon kengaymoqda, Rossiya emas. Balki Moskva o‘zining harbiy infratuzilmasi bilan NATO chegaralariga yaqinlashadi. Qarama-qarshi yo‘nalishda harakat bor va bu xavfsizligimiz haqida tashvish uyg‘otadi. Bundan qayg‘urgan holda, tabiiyki, choralar ko‘ramiz va NATO har safar chegaralarimizga yaqinlashganda mamlakat xavfsizlik arxitekturasini muvozanatlashni tanlaymiz”, — dedi Peskov.
Shuningdek, u Rossiya uchun hozir Ukrainadagi urushni davom ettirishdan boshqa yo‘l yo‘qligini aytdi. Vaziyatni tinch yo‘l bilan tartibga solish istiqbollari ko‘rinmayotganini qo‘shimcha qildi.
Avvalroq Rossiya Tashqi ishlar vazirligi Finlyandiyaning NATOga a’zoligini mamlakatlar o‘rtasidagi munosabatlarni yomonlashtirishini bildirgandi.
“Biz bir necha bor ogohlantirganimizdek, Rossiya Finlyandiyaning NATOga kirishi munosabati bilan milliy xavfsizligimizga tahdid soladigan xavfni to‘xtatish uchun harbiy-texnik va boshqa xarakterdagi javob choralarini ko‘rishga majbur bo‘ladi”, — deyilgan Rossiya TIV bayonotida.
Shuningdek, Rossiya Finlyandiya o‘zining shaxsiy siyosiy ovozini yo‘qotganini, chunki u ko‘p yillar davomida NATOga a’zo bo‘lmagan kam sonli Yevropa davlatlaridan biri bo‘lganini ta’kidlagan. NATO bosh kotibi Yens Stoltenberg esa Shvetsiya ham Finlyandiya kabi NATOga a’zo bo‘lish uchun barcha shartlarni bajarganini va uning alyansga kirishi yo‘lida hech qanday to‘siq bo‘lmasligi kerakligini qayd etgan.
Izoh (0)