АҚШ Ливан ва Ғазонинг Исроилга ракета учирганини қоралади

АҚШ Исроил Ливан ҳудудидан учирилган ракеталардан кейин ўзини ҳимоя қилиш ҳуқуқига эга эканини билдирди. Бу ҳақда Ал Arabia хабар берди.

6 апрель куни Ливан ҳудудидан Исроилга 30 га яқин ракета учирилгани маълум қилинди. Бу Исроил ҳукумати томонидан эълон қилинган маълумот ҳисобланади. Ливандаги “Ҳизбуллоҳ” гуруҳи авиаҳужум содир бўлишидан олдин фаластинликларга ҳужум қилган Исроилга қарши “барча чоралар” билан жавоб қайтаришини билдирди. Ливандан отилган ракеталардан сўнг Исроил ҳам қарши авиаҳужумни бошлади.

“Биз Ливан ва Ғазодан Исроилга ракета учирилишини қоралаймиз. Исроил хавфсизлигига бўлган содиқлигимиз қатъийдир ва Исроилнинг ҳар қандай тажовуздан ўзини ҳимоя қилиш учун қонуний ҳуқуқини тан оламиз”, — деди АҚШ Давлат департаменти матбуот котиби Ведант Пател.

Ўз навбатида Эрон президенти Иброҳим Раисий Исроилнинг фаластинликларга нисбатан муносабатини қоралаб, “Ислом ҳамкорлик ташкилотининг фавқулодда йиғилишини ўтказиш ва Фаластин халқини ҳимоя қилиш учун қўшма резолюция қабул қилишга” чақирди.

5 ва 6 апрель кунлари Исроил кучлари Ал-Ақсо масжидидаги фаластинликларга ҳужум қилди. Полиция фаластинликларни тарқатишда электр токи гранаталари ва резина ўқлардан фойдаланди. Исроил ҳуқуқ-тартибот идоралари ўнлаб “вояга етмаган жиноятчилар” полицияга тош отаётгани, хавфсизлик кучлари эса тартибни тиклаш учун ҳаракат қилишга мажбур бўлаётганини иддао қилган.

Фаластин Қизил Ярим Ой жамиятига кўра, Исроил хавфсизлик кучлари шифокорларнинг воқеа жойига келишига ва ярадорларга ёрдам кўрсатишига рухсат бермаган. Исроилнинг хатти-ҳаракатлари, хусусан, Иордания ва Миср томонидан қораланган.