O‘zbekiston bo‘ylab jala yomg‘irlari bo‘lishi kutilmoqda

O‘zbekiston bo‘ylab 3-aprel kuni soat 20:00 dan 23:00 ga qadar jala yomg‘irlari bo‘lishi kutilmoqda.

“O‘zgidromet” direktori Sherzodxo‘ja Habibullayevning xabar berishicha, faqat Nukus, Urganch va Andijon shaharlarida yog‘ingarchilik kuzatilmaydi.

Eslatib o‘tamiz, Toshkent shahrida 2-aprel kuni tushdan keyin kuzatilgan yog‘ingarchilik sabab ko‘plab ko‘cha va metro bekatlarini suv bosgani aks etgan videolar tarqalgandi. Poytaxt hokimligi yomg‘ir suvlari nima sababdan ko‘chalarga toshib ketganiga izoh bergan.

Toshkent shahridagi lotoklarning o‘rtacha diametri 300 millimetrga teng. Ular yog‘ingarchilik suvlarini kollektorlar va kanallarga yetkazadi. 2-aprel kuni ikki soat davomida kuzatilgan kuchli yog‘ingarchilik natijasida 20 millimetr yomg‘ir yog‘gan va bu aprel oyi uchun belgilangan umumiy me’yorning, ya’ni 60 millimetrning uchdan bir qismiga teng.