Jahon banki ishtirokidagi “O‘zbekiston binolari uchun toza energiya” loyihasini amalga oshirish chora-tadbirlari to‘g‘risidagi prezident qarori imzolandi.
Unga ko‘ra ijtimoiy soha obyektlarida energiya samaradorligini oshirish, elektr hamda issiqlik energiyasi sarfini tejash, ularni energiya tejaydigan texnologiyalar va qayta tiklanuvchi energiya manbalari qurilmalari bilan ta’minlash maqsadida Jahon bankidan 143 million dollar qarz olinadi.
Ushbu qarz 5 yillik imtiozli davr bilan 30 yil muddatga beriladi.
Loyihada 138 million AQSH dollari jamoat binolarida energiya samaradorligini oshirish hamda toza energiya uchun investitsiya kiritishga, ya’ni qurilish mollarini (issiqlik izolyatsiya materiallari, quvurlar, eshik va oyna romlari, qurilish materiallari) va uskunalarini (qayta tiklanuvchi energiya manabalari qurilmalari, isitish tizimi, isitish qozonlari va h.k.) sotib olish, qurilish montaj ishlariga, 5 million AQSH dollari esa loyiha doirasida texnik ko‘mak berish, personallar salohiyatini oshirish ishlariga sarflanadi.
Hujjatga ko‘ra, qarz mablag‘larini qaytarish manbalari sifatida modernizatsiya qilingan obyektlarda kommunal xizmatlarni to‘lash bo‘yicha xarajatlar uchun mahalliy budjetdan ajratiladigan mablag‘larning iqtisod qilinadigan qismi hamda iqtisod qilingan mablag‘larning yetmagan qismi bo‘yicha davlat budjeti mablag‘lari belgilangan.
Loyiha 2023—2028-yillar davomida O‘zbekistonning barcha hududlarida amalga oshiriladi. Energetika vazirligi ushbu loyiha doirasida maktabgacha ta’lim, xalq ta’limi va sog‘liqni saqlash sohalarida 800 dan ortiq muassasani modernizatsiya qilish rejalashtirilganini ma’lum qilgandi.
Izoh (0)