O‘zbekistonda 1 million aholi virusli gepatitning “B” va “C” turlariga qarshi skriningdan o‘tkaziladi. Bu haqda Sog‘liqni saqlash vazirligi axborot xizmati xabar berdi.
Ma’lum qilinishicha, 2023-yil jamoat salomatligi va kasalliklar profilaktikasi hamda aholining sanitariya-epidemiologik osoyishtaligini ta’minlash borasidagi ishlar yangi bosqichga ko‘tariladi.
Jumladan:
- emlanishi rejalashtirilgan aholini buster doza va revaksinatsiya bilan koronavirus kasalligiga qarshi vaksina tadbirlari davom ettirilib, emlash qamrovi 99,5 foizga yetkaziladi.
- 12 million bola 13 turdagi vaksina bilan boshqariluvchi yuqumli kasalliklarga qarshi 98 foiz ko‘rsatkichlarda emlanadi.
- mamlakatimizda 1 million aholi virusli gepatitning “B” va “C” turlariga skrining tekshiruvidan o‘tkaziladi. Mazkur tekshiruvlarda virusli gepatit “C” kasalligi tasdiqlangan 10,5 ming nafar bemorlarda davolash tadbirlari amalga oshiriladi.
Shuningdek, sohaga oid ruxsatnoma, xulosa va hujjatlarni kelishi bo‘yicha 3 turdagi ko‘rsatiladigan davlat xizmatlarini bosqichma-bosqich interaktiv davlat xizmatlari portali orqali berilishi yo‘lga qo‘yiladi.
Sohaga axborot kommunikatsiya texnologiyalarini joriy etish va shu orqali aksariyat funksiyalarni raqamlashtirishga o‘tish ishlari olib boriladi. Ijtimoiy hayotning turli jabhalarida zarur bo‘ladigan 14 ta sanitariya qoida va me’yorlar xalqaro andozalarga moslashtiriladi. Nazorat olib borishda xavfni tahlil qilish mexanizmini joriy qilishning yagona elektron bazasi yaratilib, “Elektron hukumat” tizimiga integratsiya qilinadi.
Izoh (0)