Andijon shahridagi Olimpiya va paralimpiya sport turlariga tayyorlash markazida o‘tkazilgan “Konstitutsiya o‘zimizniki” shiori ostidagi navbatdagi targ‘ibot tadbirida sakkiz mingdan ortiq oliy taʼlim muassasalarining talabalari hamda aholi vakillari ishtirok etdi. Bu haqda “Daryo” muxbiri xabar bermoqda.
O‘zbekiston xalq artisti Erkin Komilov, Andijon davlat tibbiyot instituti rektori, professor Madamin Madazimov, Andijon shahridagi “Robo Code” robototexnika va dasturlash maktabi direktori Abdulaziz Yakubov, Andijon davlat chet tillari instituti talabasi, viloyat inklyuziv taʼlim markazi rahbari Sarvinoz Odiljonova hamda Andijon shahridagi “Biotexservis” xizmati santexnigi Timur Mirzaxonov o‘z chiqishlarida yangi tahrirdagi Konstitutsiyaning Yangi O‘zbekiston uchun ahamiyati, unga kiritilayotgan qo‘shimcha va o‘zgarishlar xalqimizning turmush tarzini yanada yaxshilash, inson qadrini yuksaltirishga xizmat qilishini o‘z faoliyatlari misolida taʼkidlab, barchani referendumda faol ishtirok etishga chorladi.
Tadbirda O‘zbekiston xalq artistlari Ozodbek Nazarbekov, Farrux Zokirov, O‘zbekistonda xizmat ko‘rsatgan artist Sevara Nazarxon hamda Shohjahon Jo‘rayevlar ijrosidagi kuy-qo‘shiqlar barchaga ko‘tarinki kayfiyat bag‘ishladi.
Tadbirda so‘z olganlar barcha andijonliklarni konstitutsiya islohotlarida faol bo‘lishga va 30-aprelga belgilangan referendumda ishtirok etishga chaqirdi.
Konstitutsiyaviy qonun loyihasi bo‘yicha targ‘ibot tadbirlari viloyatning barcha shahar va tumanlarida o‘tkazilishi rejalashtirilgan.
Izoh (0)