“Aeroflot” aviakompaniyasining Farg‘onadan Toshkentga uchishi lozim bo‘lgan reysi texnik sabablarga ko‘ra kechiktirildi. Bu haqda Uzbekistan Airports axborot xizmati xabar berdi.
Xabarga ko‘ra, 3-aprel kuni Toshkent vaqti bilan soat 04:14 da bortida 81 yo‘lovchi bilan Moskvadan Farg‘onaga (SU1970 reysi) kelgan “Aeroflot” aviakompaniyasining samolyotida texnik nosozlik yuzaga keldi. Parvozni davom ettirish uchun samolyotni almashtirishga qaror qilindi.
Shu munosabat bilan Farg‘ona—Toshkent yo‘nalishidagi parvoz mahalliy vaqt bilan soat 05:45 dan 17:30 ga ko‘chirildi. Ushbu parvozni amalga oshirish uchun “Aeroflot” Sheremetevo aeroportidan (Moskva) qo‘shimcha B737-800 tipidagi samolyotni jo‘natdi. Ushbu samolyot kelgunigacha yo‘lovchilar mehmonxonalarga joylashtirildi.
Izoh (0)